سوشل میڈیا کا بڑھتا غلط استعمال،والدین کی عدم توجہی،کم عمر لڑکیاں سنگین مسائل کا شکار

تلنگانہ کے بھدراچلم اور کوتہ گوڑم کے علاقوں سے حال ہی میں ایسے افسوسناک واقعات سامنے آئے ہیں جہاں محض 15 سال کی عمر میں لڑکیاں حاملہ ہو گئیں۔ سوشل میڈیا کے ذریعہ کم عمری میں دوستی اور پھر جسمانی کشش کے جال میں پھنس کر یہ لڑکیوں نے اپنی زندگی تباہ کردی۔ بھدراچلم میں دو لڑکیوں کو کیئر ہوم منتقل کیا گیا جبکہ کوتہ گوڑم میں نویں جماعت کی ایک طالبہ نے حمل ٹھہرنے اور والدین کی ڈانٹ کے بعد خودکشی کی کوشش کی۔

ماہرین اور چائلڈ پروٹیکشن کمیٹی کے مطابق والدین کا حد سے زیادہ بھروسہ یا ضرورت سے زیادہ لاڈ پیار بعض اوقات بچوں کی راہ بھٹکنے کا سبب بن جاتا ہے۔ ماہرین کے مطابق والدین کو اہم باتوں پر توجہ دینی چاہیے۔ میاں بیوی کے درمیان جھگڑے یا غیر ضروری بحث بچوں کے سامنے کرنے سے گریز کریں کیونکہ یہ ان کی ذہنی نشوونما پر اثر انداز ہوتے ہیں۔ بچوں کو ہر مانگی ہوئی چیز فراہم کر دینا ہی کافی نہیں بلکہ ان کی سرگرمیوں پر نظر رکھنا اور ان کے ساتھ دوستانہ تعلق قائم کرنا ضروری ہے۔

سیل فون کے استعمال پر والدین کی کڑی نگرانی لازمی ہونی چاہیے تاکہ بچے سوشل میڈیا پر موجود فحش مواد یا غلط صحبت سے بچ سکیں۔ 12 سال کی عمر کے بعد بچوں میں جسمانی اور نفسیاتی تبدیلیاں آتی ہیں۔ اس مرحلہ پر والدین کو ان کا ہم راز بننا چاہیے۔ بچوں کو اس بات کی آزادی دیں کہ وہ اسکول کے معاملات یا ذاتی مسائل آپ سے شیئر کر سکیں۔ انہیں صحیح اور غلط کے درمیان فرق سمجھائیں اور مستقبل کے سلسلہ میں ان میں امید پیدا کریں۔ اگر بچہ کوئی غلطی کرے تو فوراً مارنے پیٹنے یا سخت سست کہنے کے بجائے پیار سے سمجھائیں، ورنہ وہ باغی ہو کر مزید غلط راستے اختیار کر سکتا ہے۔کم عمری میں بچے نئے چیلنجس کا سامنا کرتے ہیں۔ اگر والدین ان کی صلاحیتوں کو نکھارنے میں مدد نہیں کرتے تو وہ دباؤ کا شکار ہو جاتے ہیں۔ موجودہ دور میں سوشل میڈیا ایک ایسا ہتھیار ہے جو ذرا سی لاپرواہی سے معصوم ذہنوں کو تباہ کر سکتا ہے۔