بہار میں موبائل ایپ کے ذریعے کروڑوں کی ٹھگی کا انکشاف، مرکزی ملزم ہریانہ سے گرفتار

موتیہاری: بہار کے ضلع مشرقی چمپارن میں موبائل ایپ کے ذریعے ایک کروڑ روپے سے زائد کی ٹھگی کے معاملے میں پولیس نے مرکزی ملزم کو ہریانہ کے فریدآباد سے گرفتار کر لیا ہے۔ پولیس کے مطابق گرفتار ملزم سنگم کمار فرضی ’اگنی ایپ‘ کے ذریعے لوگوں سے رقم اینٹھنے والے گینگ کا ماسٹر مائنڈ ہے۔

پولیس نے بتایا کہ سنگم کمار فریدآباد کے پالی گاؤں کا رہنے والا ہے اور خود کو اگنی ایپ کا سی ای او ظاہر کرتا تھا۔ اس معاملے کی جانچ اس وقت شروع ہوئی جب رکسول علاقے کے رہنے والے ابھیشیک شرما نے گزشتہ برس سائبر تھانے میں شکایت درج کرائی۔ شکایت میں کہا گیا تھا کہ اگنی ایپ کے ذریعے نوجوانوں کو موبائل ری چارج، بجلی بل ادائیگی اور اشتہارات پر غیر معمولی منافع دینے کا لالچ دیا جاتا تھا۔

مزید یہ کہ زیادہ سرمایہ کاری کرنے پر کار سمیت قیمتی تحائف دینے کا بھی جھانسہ دیا جاتا تھا۔ گینگ کے ارکان مختلف مقامات پر سیمینار منعقد کر کے نوجوانوں کو سرمایہ لگانے کے لیے آمادہ کرتے تھے۔ ابتدائی مرحلے میں ایپ کے والٹ میں جمع رقم پر کچھ منافع دکھایا جاتا تاکہ لوگوں کا اعتماد حاصل کیا جا سکے، لیکن جب بڑی تعداد میں افراد نے زیادہ رقم جمع کرا دی تو اچانک ایپ بند کر دی گئی اور ملزمان فرار ہو گئے۔

موتیہاری سائبر کے پولیس نائب سپرنٹنڈنٹ ابنَو پراسر نے بدھ کو بتایا کہ درجنوں متاثرین سے کروڑوں روپے کی ٹھگی کیے جانے کا اندیشہ ہے۔ تحقیق کے دوران اطلاع ملی کہ اس سائبر ٹھگی کا مرکزی ملزم ہریانہ میں روپوش ہے۔ اس کے بعد ان کی قیادت میں ایک خصوصی چھاپہ مار ٹیم تشکیل دی گئی جس نے فریدآباد میں کارروائی کرتے ہوئے سنگم کمار کو گرفتار کر لیا۔

پولیس نائب سپرنٹنڈنٹ نے بتایا کہ ملزم سے پوچھ گچھ جاری ہے اور گینگ کے دیگر ارکان، بینک کھاتوں اور ڈیجیٹل لین دین کی تفصیلات حاصل کی جا رہی ہیں۔ پولیس یہ بھی جاننے کی کوشش کر رہی ہے کہ یہ نیٹ ورک کن دیگر ریاستوں تک پھیلا ہوا تھا۔