عآپ کے کئی بانی اراکین نے تھاما کانگریس کا ہاتھ، اروندر لولی نے دلائی کانگریس کی رکنیت

نئی دہلی: دہلی پردیش کانگریس کمیٹی کے صدر اروندر سنگھ لولی نے آج عآپ (عام آدمی پارٹی) چھوڑ کر آئے کئی لیڈران و کارکنان کا کانگریس پارٹی میں استقبال کیا۔ اس موقع پر انھوں نے کہا کہ روزانہ کانگریس کا کنبہ بڑھ رہا ہے اور لگاتار لوگوں کے پارٹی سے جڑنے کے سبب تنظیم کو مضبوطی مل رہی ہے۔

آج دہلی کانگریس دفتر میں اروندر سنگھ لولی نے عآپ کے بانی اراکین اور گزشتہ 10 سال سے عآپ کے لیے سرگرمی کے ساتھ کام کرنے والے کئی لیڈران و کارکنان کو کانگریس کا پٹکا پہنا کر باضابطہ پارٹی میں شامل کیا۔ انھوں نے عآپ نیشنل کونسل بانی اراکین راج شوقین، مین وِنگ ضلع سکریٹری ونیت اپادھیائے، اسمبلی الیکشن انچارج سنتوش سکسینہ، آر ڈبلیو اے انچارج اوشا، ویمنس وِنگ کی آرادھنا، سلطان پور ماجرا اسمبلی حلقہ چیف جئے پال پردھان، ڈویزنل چیف اختر بھائی، ضلع نائب صدر سنجے شرما، روہنی اسمبلی، ماحولیاتی وِنگ ضلع انچارج سنجے کمار متل، وشال بھائی، اختر خان اور یوتھ وِنگ کے اسمبلی صدر گولڈی شوقین سمیت سینکڑوں کی تعداد میں عآپ کارکنان کو کانگریس کی رکنیت دلائی۔ اس موقع پر کانگریس لیڈر جتیندر سنگھ کوچر بھی موجود تھے۔

اس موقع پر اروندر سنگھ لولی نے کہا کہ بی جے پی اور عآپ میں گھٹن اور تکلیف برداشت کر رہے لیڈران و کارکنان کانگریس پارٹیوں کی پالیسیوں اور نظریات سے متاثر ہو کر ہمارے کنبہ کے ساتھ لگاتار جڑ رہے ہیں۔ پارٹی میں شامل ہونے والے لیڈران اور ان کے حامیوں کی صلاحیت کا بہتر استعمال کیا جائے گا تاکہ ان کا وقار مجروح نہ ہو۔ دہلی کانگریس صدر نے مزید کہا کہ بی جے پی اور عآپ دونوں ہی اس بات سے مایوس ہیں کہ ان کے کئی اہم لیڈران کانگریس کے نظریات، پالیسیوں اور منصوبوں سے متاثر ہو کر بڑی تعداد میں اپنے حامیوں کے ساتھ کانگریس میں شامل ہو رہے ہیں۔ یہ سبھی راہل گاندھی جی کی مثبت پالیسی اور بھارت جوڑو یاترا کی کامیابی سے متاثر ہو کر اپنا رخ کانگریس کی طرف کر رہے ہیں۔

کانگریس میں شامل ہونے کے بعد راج شوقین نے کہا کہ وہ دہلی پردیش کانگریس کمیٹی صدر اروندر لولی کی شاندار قیادت اور راہل گاندھی کی تاریخی بھارت جوڑو یاترا سے متاثر ہو کر کانگریس میں شامل ہوئے ہیں۔ انھوں نے مزید کہا کہ ’’ہم اروندر لولی کی قیادت میں دہلی میں کانگریس کو مضبوط کرنے کے لیے سخت محنت کریں گے اور جو بھی ذمہ داری دی جائے گی اس کو ایمانداری سے نبھائیں گے۔‘‘