مہاکمبھ میں ’امرت اسنان‘ سے محروم رہنے والے شخص نے ریلوے کو ٹھہرایا ذمہ دار، مانگا 50 لاکھ روپے کا جرمانہ

پریاگ راج میں جاری مہاکمبھ میلہ کئی لوگوں کے لیے خوشگوار یادیں سمیٹے ہوئے ہے، تو کئی لوگوں کے لیے مشکلات سے بھرا ثابت ہو رہا ہے۔ بہار کے مظفر پور باشندہ راجن جھا کے ساتھ مہاکمبھ کے سفر میں کچھ ایسی دقتیں پیش آئیں کہ وہ ’امرت اسنان‘ (غسل) کرنے سے محروم رہ گئے، اور اس کے لیے انھوں نے ریلوے کو ذمہ دار ٹھہرایا۔

پیشہ سے وکیل راجن جھا نے مونی اماوسیا پر امرت اسنان نہیں کر پانے کے لیے ریلوے کو ذمہ دار ٹھہراتے ہوئے 50 لاکھ روپے کا جرمانہ طلب کیا ہے۔ ان کا کہنا ہے کہ مظفر پور سے پریاگ راج جانے کے لیے انھوں نے اپنے اور فیملی کے 2 دیگر اراکین کے لیے تھرڈ اے سی ٹکٹ سوتنترتا سینانی ٹرین میں لی تھی۔ لیکن ریلوے کی بدانتظامی کے سبب وہ اپنے کوچ تک نہیں پہنچ پائے، نتیجہ یہ ہوا کہ وہ پریاگ راج نہیں جا سکے اور امرت اسنان کی خواہش بھی پوری نہیں ہو پائی۔

راجن جھا نے مونی اماوسیا کے موقع پر امرت اسنان کرنے کے مقصد سے 27 جنوری 2025 کو مظفر پور سے پریاگ راج جانے کے لیے تتکال ٹکٹ کٹایا تھا۔ اے سی کوچ میں بی 3 میں سیٹ نمبر 45، 46 اور 47 نمبر کی سیٹ پر بیٹھ کر انھیں اپنے ساس و سسر کے ساتھ جانا تھا۔ ٹرین رات 9.30 بجے کھلنی تھی، لیکن راجن اپنے ساس سسر کے ساتھ ڈھائی گھنٹے قبل، یعنی 7 بجے ہی اسٹیشن پہنچ گیا تھا۔ راجن نے بتایا کہ جس ٹرین کے جس کوچ میں ان کی سیٹ تھی، اس کا دروازہ اندر سے بند تھا۔ مہاکمبھ میں غسل کے لیے جانے والے مسافروں سے اسٹیشن کھچا کھچ بھرا ہوا تھا۔ اسٹیشن پر افرا تفری کا ماحول دیکھنے کو مل رہا تھا۔ راجن کا کہنا ہے کہ ریلوے کی بدانتظامی کے سبب وہ اور ان کی فیملی کوچ تک نہیں پہنچ سکے اور ٹرین چھوٹ گئی۔

راجن جھا نے اس معاملے میں ایڈووکیٹ ایس کے جھا کے ذریعہ ریلوے سے 50 لاکھ روپے کا ہرجانہ بطور جرمانہ طلب کیا ہے۔ معاملے کی جانکاری دیتے ہوئے ایڈووکیٹ ایس کے جھا نے بتایا کہ یہ صارفین تحفظ ایکٹ کے تحت سروس کی کمی کا معاملہ ہے، جس میں ریلوے کی لاپروائی نظر آ رہی ہے۔ راجن کو اپنی فیملی کے ساتھ امرت اسنان کے لیے جانا تھا، لیکن کوچ کا دروازہ نہ کھلنے کے سبب وہ اپنی منزل تک نہیں پہنچ پائے۔