بہار میں کورونا ٹیکہ کاری کی پھر کھلی قلعی، پی ایم مودی کو بھی لگا دیا ٹیکہ!

بہار میں ارول کے بعد اب کورونا ٹیکہ کاری میں بدانتظامی کا مزید ایک معاملہ سامنے آیا ہے۔ تازہ معاملہ سہرسہ ضلع کے ایک طبی مرکز کا ہے جہاں ٹیکہ کاری کی فہرست میں وزیر اعظم نریندر مودی، راہل گاندھی، اداکارہ راکھی ساونت، رنبیر کپور، گلوکارہ رانو منڈل سمیت کئی اہم ہستیوں کو 24 اکتوبر کو ٹیکے کی پہلی خوراک دینے کی بات کہی گئی ہے۔

سہرسہ کے نوہٹّہ پی ایچ سی سے جڑے ٹیکہ کاری کے سیشن سائٹ کووِن کی فہرست میں کئی طرح کی خامیاں سامنے آئی ہیں۔ اس کمپیوٹرائزڈ پی ڈی ایف فائل میں وزیر اعظم نریندر مودی، کانگریس لیڈر راہل گاندھی، اداکارہ راکھی ساونت، اداکار رنبیر کپور، گلوکارہ رانو منڈل اور ضلع کی ایس پی لپی سنگھ کو 24 اکتوبر کو ٹیکے کی پہلی خوراک دینے کی بات کہی گئی ہے۔

ایک افسر کے مطابق ان اہم اشخاص کی انٹری 24 اکتوبر کو محکمہ صحت کی لسٹ میں کی گئی ہے۔ ان کے نام کے ساتھ فون نمبر بھی لکھے ہیں اور یہ سبھی فون نمبر فرضی ہیں۔ رابطہ کرنے پر سول سرجن ڈاکٹر اودھیش کمار نے بتایا کہ معاملے کی جانچ کی جا رہی ہے۔ محکمہ کو ابھی تک اس سلسلے میں کوئی شکایت نہیں ملی ہے۔

اس سے قبل دسمبر کے پہلے فتہ میں بہار کے ارول ضلع میں ایک صحت مرکز میں بھی ایسی ہی لاپروائی دیکھنے کو ملی تھی۔ وہاں وزیر اعظم نریندر مودی، مرکزی وزیر داخلہ امت شاہ اور اداکارہ پرینکا چوپڑا کو کورونا ویکسین کی پہلی خوراک دینے کی بات کہی گئی تھی۔