ایس آئی آر: باڑمیر میں اونٹ کی سواری کر کے ووٹروں تک پہنچ رہے ایس ڈی ایم اور بی ایل او

ملک کے مختلف حصوں میں ایس آئی آر سے جڑی حیران کن خبریں سامنے آ رہی ہیں اور اب راجستھان کے باڑمیر کی خبر توجہ کھینچ رہی ہے، جہاں افسران اونٹوں پر سوار ہو کر ووٹروں تک پہنچ رہے ہیں۔ مقامی انتظامیہ اسے ایک انوکھی اور ضرورتا کے تحت اختیار کی گئی پہل بتا رہی ہے، کیونکہ کئی مواضعات ریگستانی، ریت سے گھرے علاقوں میں واقع ہیں، جہاں بس یا دیگر ذرائع آسانی سے دستیاب نہیں۔

ان حالات میں ووٹروں کو تلاش کرنا الیکشن افسران کے لیے بڑا چیلنج بنا ہوا ہے۔ اس مشکل سے نمٹنے کے لیے اس ڈی ایم اور بی ایل او اونٹ پر سوار ہو کر ووٹروں تک پہنچنے کی کوشش کر رہے ہیں تاکہ مقررہ وقت کے اندر درست طریقے سے مہم کو پایہ تکمیل تک پہنچایا جا سکے۔

ایس آئی آر کے تحت ہر ووٹر کی جسمانی تصدیق ضروری ہے، جس کے لیے بی ایل او ریگستان میں روزانہ گھنٹوں تک گھومتے ہیں۔ بعض اوقات دوری اتنی زیادہ ہوتی ہے کہ انہیں رات بھی دور دراز بستیوں میں گزارنی پڑتی ہے۔ ان چیلنجوں کے درمیان ان کے حوصلے کو بڑھانے کے لیے سیڑوا کے ایس ڈی ایم خود میدان میں اتر آئے ہیں۔

ایس ڈی ایم بدری نارائن وشنوئی نے اونٹ پر بیٹھ کر باور والا اور آس پاس کے مواضعات میں تقریباً 2 کلومیٹر کا سفر کیا۔ انہوں نے گھر گھر جا کر گاؤں والوں سے ملاقات کی اور انہیں ایس آئی آر کا عمل سمجھایا اور ضروری دستاویزات کی تصدیق بھی کی۔ انہوں نے بتایا کہ اس علاقے میں لوگ بہت دور دور رہتے ہیں، کئی خاندان معلومات کی کمی کی وجہ سے ایس آئی آر مہم کی اہمیت نہیں سمجھ پاتے۔ ایسے میں انتظامیہ کا کام صرف تصدیق کرنا نہیں بلکہ لوگوں کو مہم سے آگاہ کرنا بھی ان کی ذمہ داری ہے۔

وہیں باڑمیر انتظامیہ کے مطابق سرحدی علاقوں میں رہنے والے ہر فرد تک جمہوریت کی آواز پہنچنا بہت ضروری ہے۔ یہی وجہ ہے کہ اعلیٰ افسر خود گھر گھر جا کر ووٹروں کو اس عمل کے بارے میں آگاہ کر رہے ہیں۔ ایس آئی آر مہم کے ذریعہ ووٹر لسٹ کو اپڈیٹ اور درست کرنا ہے تاکہ کسی بھی ووٹر کا نام چھوٹنے نہ پائے۔