ہندوستانی فوج کی بڑی کامیابی، میانمار بارڈر پر 10 شدت پسند ہلاک، بھاری اسلحہ برآمد

نئی دہلی: ہندوستانی فوج نے ہندوستان-میانمار سرحد کے قریب ایک بڑی کارروائی کے دوران 10 شدت پسندوں کو ہلاک کر دیا ہے۔ فوج کی مشرقی کمان کی جانب سے ایکس (سابق ٹوئٹر) پر دی گئی معلومات کے مطابق یہ آپریشن منی پور کے چندیل ضلع میں خفیہ اطلاع کی بنیاد پر انجام دیا گیا۔

مشرقی کمان کے مطابق، “14 مئی 2025 کو اسپیئر کور کے تحت تعینات آسام رائفلز کی یونٹ نے منی پور کے چندیل ضلع میں واقع نیو سمتل گاؤں کے قریب ایک مخصوص آپریشن شروع کیا۔”

بیان میں کہا گیا کہ خفیہ معلومات سے یہ پتہ چلا تھا کہ ہندوستان-میانمار سرحد کے قریب شدت پسند سرگرم ہیں۔ کارروائی کے دوران مشتبہ شدت پسندوں نے سکیورٹی فورسز پر فائرنگ کی، جس کا جواب فوجیوں نے کنٹرول اور حکمت کے ساتھ دیا۔ اس فائرنگ کے تبادلے میں 10 شدت پسند مارے گئے جبکہ ان کے قبضے سے بھاری مقدار میں ہتھیار اور گولہ بارود برآمد کیا گیا۔ منی پور میں جاری بدامنی کے درمیان فوج کی یہ کارروائی سکیورٹی فورسز کے لیے ایک بڑی کامیابی قرار دی جا رہی ہے۔

یہ کارروائی اس وقت ہوئی ہے جب ملک کی مشرقی سرحد پر سکیورٹی کے حوالے سے خدشات میں اضافہ ہوا ہے۔ حال ہی میں ہندوستان نے آپریشن "سندور" کے تحت پاکستان کے زیر انتظام دہشت گرد ٹھکانوں پر فضائی حملے کیے تھے، جس کے بعد ہندوستان-پاکستان سرحد پر کشیدگی کی صورتحال بنی ہوئی ہے۔

یاد رہے کہ گزشتہ سال مرکزی حکومت نے ہندوستان اور میانمار کے درمیان 1,610 کلومیٹر طویل بین الاقوامی سرحد پر باڑ لگانے اور سڑکوں کی تعمیر کی منظوری دی تھی۔ یہ فیصلہ منی پور میں غیر قانونی دراندازی کو روکنے کے لیے لیا گیا تھا۔

سرکاری ذرائع کے مطابق، میانمار سے درانداز ہندوستان میں داخل ہو کر منی پور میں بدامنی پھیلا رہے ہیں۔ اسی تناظر میں ہندوستان حکومت نے سرحد پر 'مفت نقل و حرکت' کے معاہدے کو ختم کرنے کا اعلان کیا ہے، جو پہلے دونوں ممالک کے سرحدی علاقوں کے باشندوں کو کچھ حد تک آزادانہ آمدورفت کی اجازت دیتا تھا۔

ذرائع کے مطابق، سکیورٹی سے متعلق کابینہ کمیٹی نے ہندوستان-میانمار سرحد پر 31 ہزار کروڑ روپے کی لاگت سے باڑ لگانے اور سرحدی سڑکوں کی تعمیر کے منصوبے کو اصولی منظوری دے دی ہے۔