احمد آباد واقع ایسن پور جھیل کے قریب بڑی کارروائی، 918 غیرقانونی مکانات پر چلا بلڈوزر

گجرات کے احمد آباد میں انتظامیہ نے جھیلوں سے غیر قانونی قبضہ ہٹانے کی مہم تیز کر دی ہے۔ چنڈولا جھیل پر کارروائی کے بعد اب ایسن پور جھیل پر بنے سینکڑوں پختہ مکانوں کو منہدم کرنے کی مہم شروع کر دی گئی ہے۔ پیر (24 نومبر) کو صبح سے ہی ایسن پور جھیل علاقہ میں 15 سے زائد جے سی بی مشینیں پہنچیں اور 918 غیرقانونی مکانوں کو منہدم کرنے کا کام شروع کر دیا گیا۔

رپورٹس کے مطابق عیسان پور جھیل پر غیرقانونی قبضہ گزشتہ 50 سال سے زائد سے تھا۔ ان مکانوں میں کئی خاندان نسلوں سے رہ رہے تھے۔ انتظامیہ نے ضروری قانونی عمل مکمل کرنے کے بعد جھیل کے علاقے کو خالی کرانے کا فیصلہ لیا ہے۔ بلڈوزر کارروائی کے دوران بڑی تعداد میں پولیس اہلکار تعینات کیے گئے ہیں۔ افسران مسلسل جائے وقوع پر موجود رہ کر بلڈوزر کارروائی کی نگرانی کر رہے ہیں۔

واضح رہے کہ احمدآباد میونسپل کارپوریشن کے ذریعہ گزشتہ کچھ سالوں سے شہر کی جھیلوں اور آبی ذخائر کو بحال کرنے کی سمت میں کوشش کی جا رہی ہیں۔ غیرقانونی تعمیرات کے سبب آبی جماؤ، سیلاب اور ماحولیاتی عدم توازن جیسے مسائل کو دیکھتے ہوئے اس طرح کی کارروائیاں کی جا رہی ہیں۔ بڑے پیمانے پر انہدامی کارروائی کے بعد ایسن پور جھیل کو اس کی اصل شکل میں لایا جا سکے گا اور علاقہ میں پانی کے تحفظ کی صورتحال بھی بہتر ہوگی۔

ماہرین کے مطابق اتنے بڑے پیمانے پر کی گئی انہدامی کارروائی کے بعد ایسن پور جھیل کی قدرتی پانی رکھنے کی صلاحیت دوبارہ بحال ہونے کی امید ہے۔ اس سے نہ صرف مقامی ماحول میں بہتری آئے گی، بلکہ مستقبل میں پانی کے تحفظ اور زیر زمین پانی کی سطح کو بھی بہتر بنایا جا سکتا ہے۔ انہدامی مہم کی تکمیل کے بعد میونسپل کارپوریشن جھیل والے علاقے کو صاف کر کے اسے بحال کرنے کے منصوبے پر کام کرے گی، تاکہ یہ علاقہ پھر سے قدرتی طور پر زندہ ہو سکے۔