جنوبی کشمیر کے ضلع پلوامہ کے نکلورہ گاؤں میں لشکر طیبہ کا جنگجو گرفتار: پولیس کا دعویٰ

سری نگر: جموں وکشمیر پولیس نے جنوبی کشمیر کے پلوامہ کے نکلورہ گاؤں میں جمعے کے روز ایک تلاشی آپریشن کے دوران لشکر طیبہ نامی جنگجو تنظیم سے وابستہ ایک جنگجو گرفتار کرنے کا دعویٰ کیا ہے۔

پولیس ذرائع نے کہا کہ ایک مصدقہ اطلاع پر کارروائی کرتے ہوئے فوج کی 55 آر آر، سی آر پی ایف کی 182 بٹالین اور جموں و کشمیر پولیس کی سپیشل آپریشنز گروپ کی ایک مشترکہ ٹیم نے جمعے کے روز ضلع پلوامہ کے نکلورہ گاؤں میں تلاشی آپریشن کے دوران ایک جنگجو کو ایک میوہ باغ سے زندہ پکڑ لیا۔

انہوں نے گرفتار شدہ جنگجو کی شناخت شمیم صوفی ولد غلام محمد صوفی ساکن نکلورہ کے بطور کی ہے جو لشکر طیبہ نامی جنگجو تنظیم سے وابستہ تھا۔ان کا کہنا تھا کہ گرفتار شدہ جنگجو کی تحویل سے ایک پستول اور دیگر گولہ بارود ضبط کیا گیا ہے۔

دریں اثنا کشمیر زون پولیس نے اپنے آفیشل ٹویٹر ہینڈل پر ایک ٹویٹ میں کہا: ’پلوامہ پولیس اور سیکورٹی فورسز نے کالعدم تنظیم لشکر طیبہ سے وابستہ شمیم صوف ولد غلام محمد صوفی ساکن نکلورہ پلوامہ نامی ایک جنگجو کو گرفتار کیا ہے اس کی تحویل سے اسلحہ و گولہ بارود کے علاوہ کچھ قابل اعتراض مواد بھی بر آمد ہوا ہے‘۔