کیرالہ: کوچی یونیورسٹی میں بھگدڑ مچنے سے 4 طلبا کی موت، 60 سے زائد زخمی

کیرالہ کی کوچی یونیورسٹی میں ہفتہ کے روز ایک تقریب کے دوران زوردار بھگدڑ مچ گئی۔ اس بھگدڑ کی وجہ سے 4 طلبا کی موت ہو گئی اور کئی درجن طالب علم زخمی بھی ہوئے۔ ریاست کے وزیر صحت وینا جارج نے اس حادثہ کی تصدیق کی ہے۔ انھوں نے کہا کہ یہ حادثہ یونیورسٹی کی سالانہ تقریب کے دوران ہوئی۔ میڈیا کو انھوں نے بتایا کہ ’’کلامسیری میڈیکل کالج میں 4 لوگوں کی لاشیں ملی ہیں۔‘‘

میڈیا رپورٹس میں بتایا جا رہا ہے کہ حادثہ کے وقت گلوکارہ نکیتا گاندھی اپنا پرفارمنس پیش کر رہی تھیں۔ یونیورسٹی کے وائس چانسلر نے اس حادثہ کے بارے میں جانکاری دیتے ہوئے بتایا کہ بھگدڑ اس وقت شروع ہوئی جب اچانک بارش ہونے لگی۔ انھوں نے کہا کہ ’’یہ کنسرٹ جمعہ کے روز شروع ہوا تھا۔ آج بھی کئی پروگرام ہونے تھے۔ آج موسیقی کا پروگرام چل رہا تھا جب بھگدڑ مچی۔ دراصل پڑوسی کالجوں کے طلبا بھی تقریب میں شرکت کے لیے پہنچے تھے۔ بھیڑ بہت زیادہ ہو گئی۔ تقریباً 2000 لوگ اندر چلے گئے اور وہ سیڑھیوں پر دوڑنے لگے۔‘‘

کوچی نگر نگر کونسلر پرمود نے اس حادثہ کے تعلق سے اپنے بیان میں کہا کہ ’’ایک ہی دروازہ سے انٹری اور ایگزٹ کے سبب بھگدڑ مچی۔ طالب علم ایک ہی دروازہ سے آنے کی کوشش کر رہے تھے۔ جو طالب علم سیڑھیوں سے داخل کر رہے تھے وہ پہلے گرے، اور پھر دروازے پر زبردست بھیڑ نے انھیں کچل دیا۔‘‘ میڈیا رپورٹس کے طمابق کیرالہ کے افسروں نے کہا ہے کہ کلامسیری میڈیکل کالج لائے جانے تک دو لڑکوں اور دو لڑکیوں کی موت ہو چکی تھی۔ مزید جانکاری دی گئی کہ اس بھگدڑ میں 60 سے زیادہ افراد زخمی ہوئے ہیں۔