دستور ساز اسمبلی کے 264 اراکین نے ٹھیک 76 سال قبل ہندوستانی آئین پر کیا تھا دستخط، جئے رام رمیش نے شیئر کی تصویر

کانگریس جنرل سکریٹری جئے رام رمیش نے دستور سازی کے سفر سے متعلق ایک اہم منزل کا ذکر کرتے ہوئے ہفتہ کے روز کہا کہ ’’ٹھیک 76 سال قبل دستور ساز اسمبلی کے 264 اراکین نے ہندوستانی آئین پر رسمی طور سے دستخط کیے تھے۔‘‘ رمیش نے یہ ذکر سوشل میڈیا پلیٹ فارم ’ایکس‘ پر کیا ہے، جس میں یہ بھی لکھا ہے کہ ’’ان سبھی اراکین نے ایک ساتھ تصویر بھی کھنچوائی تھی۔‘‘ کانگریس لیڈر نے گروپ میں کھنچوائی گئی یہ تصویر اور کچھ دیگر تصویریں بھی پوسٹ کے ساتھ شیئر کی ہیں۔

اپنی سوشل میڈیا پوسٹ میں جئے رام رمیش نے لکھا ہے کہ ’’آج سے 76 سال قبل دستور ساز اسمبلی کے 264 اراکین نے ہندوستانی آئین پر رسمی طور سے دستخط کیے تھے، جسے وہ پہلے ہی 26 نومبر 1949 کو اختیار کر چکے تھے۔ انھوں نے اس کی تین کاپیوں پر دستخط کیں، جن میں سے 2 انگریزی اور ایک ہندی میں ہاتھوں سے لکھی ہوئی تھیں اور ان میں ’شانتی نکیتن‘ کے ان فنکاروں کے ذریعہ بنائی گئیں 22 تصویریں شامل تھیں، جن کی قیادت خود نندلال بوس نے کی تھی۔‘‘ انھوں نے بتایا کہ انگریزی مین خوبصورت کیلیگرافی پریم بہاری نارائن رائے زادہ نے کی تھی، جبکہ ہندی میں یہ کام وسنت کے. وید نے انجام دیا تھا۔

اس پوسٹ میں جئے رام رمیش لکھتے ہیں کہ ’’ان ہاتھوں سے لکھی کاپیوں کے پہلے صفحہ پر قومی نشان موجود تھا، جسے دینا ناتھ بھارگو نے ڈیزائن کیا تھا۔ نند لال بوس کی گزارش پر انھوں نے کچھ مہینوں تک کولکاتا کے چڑیا خانہ میں جا کر شیروں کا مطالعہ کیا، تاکہ نشان میں بنے شیر بالکل حقیقی شیروں جیسے نظر آئیں۔‘‘ انھوں نے یہ بھی لکھا ہے کہ ’’اگست 1954 میں قائم للت کلا اکادمی نے اس تصویر مشمولہ آئین کو ’ایک بنیادی فنی کتاب‘ بتایا، جو ہندوستان کی کثیر سطحی تاریخ کو پیش کرتا ہے اور تنوع میں یکجہتی کے منتر کا جشن مناتا ہے۔ اسی دن اراکین نے ایک ساتھ بیٹھ کر گروپ تصویر کھنچوائی تھی، جو وقت سے پرے، ایک تاریخی یاد بن گئی۔‘‘