’امریکہ اور اس کے چاپلوس اسرائیل کو گھٹنوں پر لا دیا‘، محبوبہ نے ایرانی قیادت کی بہادری کو کیا سلام

پی ڈی پی سربراہ اور جموں و کشمیر کی سابق وزیر اعلیٰ محبوبہ مفتی نے ایران کی جم کر تعریف کی ہے۔ انہوں نے آج کہا کہ اسرائیل کے ساتھ لڑائی کے بعد مسلم ملکوں کے درمیان ایران کا قد کافی بڑھ گیا ہے۔ اس نے اسرائیل اور امریکہ کو اس کے گھٹنوں پر لا دیا ہے۔ میں ایرانی قیادت کی بہادری اور عزم مصمم کو سلام کرتی ہوں۔ یہاں کی فوج اور لوگوں نے جس طرح سے اسرائیل کا مقابلہ کیا ہے وہ قابل تعریف ہے۔ انہوں نے یہ بھی کہا کہ ایران کے پاس کوئی جوہری اسلحہ نہیں ہے، لیکن یقین اور شہید ہونے کی قوت ارادی ہے۔

’لائیو ہندوستان‘ کی خبر کے مطابق پی ڈی پی سربراہ نے اسرائیل کو امریکہ کا چاپلوس بتاتے ہوئے کہا کہ ایران نے امریکہ اور اس کے چاپلوس ملک کو گھٹنے ٹیکنے پر مجبور کر دیا۔ آج ڈونالڈ ٹرمپ جنگ بندی کی بات کر رہے ہیں۔ اس کا مطلب ہے کہ اب تک جنگ کے نتیجے اسرائیل اور امریکہ کی امید کے برعکس رہے ہیں۔

محبوبہ مفتی نے کہا کہ اس جنگ نے ایران کو مسلم ممالک کے قائد کی طرح اُبھارا ہے۔ حالانکہ دیگر مسلم ملکوں نے زیادہ کچھ نہیں کیا۔ انہوں نے امریکہ پر حملہ بولتے ہوئے کہا کہ یہ ملک مسلم ملکوں پر اپنی مرضی سے حملہ کرنے کا عادی ہے، چاہے وہ عراق ہو، افغانستان ہو یا شام۔ لیکن اس بار امریکہ کو ایک مسلم ملک پر حملہ کرنے کا خمیازہ بھگتنا پڑا ہے۔

اس دوران محبوبہ مفتی نے ڈونالڈ ٹرمپ کو نوبل امن انعام دیے جانے سے متعلق پاکستان کی تجویز پر بھی تبصرہ کیا۔ انہوں نے اسے بچکانی حرکت قرار دیا۔ انہوں نے کہا کہ یہ افسوسناک ہے کہ پاکستان نے ٹرمپ کو نوبل انعام کے لیے نامزد کرنے کی بات کہی۔ مجھے لگتا ہے کہ یہ بچکانا اور غیر ضروری عمل ہے، خاص کر ایسے شخص کے ساتھ جو نہیں جانتا کہ وہ کیا کر رہا ہے ارو اگلے ہی لمحہ وہ کیا کرنے والا ہے۔

قابل ذکر ہے آج صبح امریکہ کے صدر ڈونالڈ ٹرمپ نے اعلان کیا کہ ایران اور اسرائیل کے درمیان جنگ بندی ہو چکی ہے۔ اس کے بعد گزشتہ کچھ دنوں سے دونوں ملکوں کے درمیان جاری شدید گھمسان کے کم ہونے کی امید ظاہر کی جا رہی ہے۔