آئی پی ایل نیلامی 23 دسمبر کو، کولکاتا کی نظر بیک اَپ وکٹ کیپر پر، چنئی کی نگاہیں سیم کرن پر!

سابق ہندوستانی بلے باز رابن اتھپا نے 23 دسمبر کو ہونے والی آئی پی ایل نیلامی کے لیے کولکاتا نائٹ رائیڈرس اور چنئی سپرکنگز کے ذریعہ چنے جانے والے کھلاڑیوں پر اپنے نظریات ظاہر کیے ہیں۔ اتھپا کا کہنا ہے کہ کولکاتا نائٹ رائیڈرس (کے کے آر) کو آندرے رسل کے لیے بیک اَپ کے طور پر کھلاڑی کو چننا ہوگا۔ انھوں نے مزید کہا کہ "کے کے آر اس نیلامی میں تین کھلاڑیوں کی تلاش کرے گا اور ان میں سے ایک گرباز کے لیے بیک اَپ وکٹ کیپر ہوگا۔ دوسرا کھلاڑی آندرے رسل کے لیے بیک اَپ ہوگا۔ تیسرا وہ ایک ہندوستانی تیز گیندباز کی تلاش میں ہوں گے۔"

رٹنشن کے پہلے کے کے آر کی ٹیم کافی سرگرم تھی۔ انھوں نے کئی کھلاڑیوں کو اپنی ٹیم سے ریلیز کیا، ساتھ ہی ساتھ شاردل ٹھاکر، لاکی فرگوسن اور رحمن اللہ گرباز کو اپنی ٹیم میں شامل کیا۔ ان کے پاس فی الحال 14 کھلاڑیوں کا گروپ ہے، جس میں چار تیز گیندباز اور دو اسپن گیندباز ہیں۔ ٹاپ آرڈر میں ان کے پاس کچھ بھروسے مند کھلاڑی بھی ہیں، حالانکہ ٹیم میں کئی ایسی پوزیشن ہیں جو خالی ہیں اور اتنے کم روپے کے پرس میں ان پوزیشن کو بھرنا آسان نہیں ہونے والا ہے۔

کولکاتا ٹیم کے پاس دس ٹیموں میں سب سے چھوٹا پرس ہے۔ ان کے پاس ابھی صرف 7.05 کروڑ روپے ہیں اور انھیں گیارہ کھلاڑیوں کو اپنی ٹیم میں شامل کرنا ہے جن میں سے تین غیر ملکی کھلاڑی ہو سکتے ہیں۔ ایک ہندوستانی بلے باز جو وکٹ کیپنگ کا متبادل بھی فراہم کرے یا فلوٹر کے طور پر بھی کام کرے۔

اتھپا نے چنئی سپرکنگز کی ممکنہ خرید پر بھی اپنے نظریات ظاہر کیے۔ اس نیلامی میں چنئی کے پاس خرچ کرنے کے لیے 20.45 کروڑ روپے بچے ہوئے ہیں اور ان کے پاس کم از کم دو غیر ملکی اور پانچ ہندوستانی کھلاڑیوں کے لیے جگہ ہے۔ انگلینڈ کے آل راؤنڈر سیم کرن چنئی کے لیے نئے نہیں ہیں اور 2020 اور 2021 کے سیزن میں ان کے لیے 23 میچ کھیل چکے ہیں۔ اب جب ڈوین بریوو ٹیم میں نہیں ہیں تو کرن ان کی بھرپائی کر سکتے ہیں۔ نیلامی میں چنئی کرن کے پیچھے جانا چاہے گی۔