ہندوستان نے امریکہ سے اپنی شدید برہمی کا کیا اظہار

ہندوستان نے امریکی سفارت خانے کے انچارج کے سامنے سان فرانسسکو میں واقع اپنے قونصلیٹ جنرل میں توڑ پھوڑ کے واقعات پر سخت احتجاج درج کرایا ہے اور برہمی کا اظہار کیا ہے۔

وزارت خارجہ کے مطابق امریکی سفارتخانے کے افسر انچارج سے میٹنگ میں واضح طور پر کہا گیا کہ سفارتی نمائندگی کی حفاظت اور تحفظ امریکی حکومت کی بنیادی ذمہ داری ہے۔ یہ بھی کہا گیا کہ اس معاملے میں ایسے اقدامات کیے جائیں تاکہ آئندہ ایسا کوئی واقعہ پیش نہ آئے۔

وزارت خارجہ کے مطابق واشنگٹن میں ہندوستانی سفارت خانے نے امریکی محکمہ خارجہ کو ہندوستان کے ان خدشات سے آگاہ کیا اور ان سے کہا کہ وہ اپنی ذمہ داری پوری کریں۔

کل سان فرانسسکو میں خالصتان کے حامی لوگوں کے ایک بنیاد پرست گروپ نے ہندوستانی قونصلیٹ جنرل کی عمارت پر حملہ کیا اور توڑ پھوڑ کی۔ اس سے پہلےلندن میں ہندوستانی ہائی کمیشن میں توڑ پھوڑ اور عمارت کی پہلی منزل سے ترنگا اتارنے کے الزام میں ایک شخص کو گرفتار کیا گیا ہے۔

مقامی میڈیا نے بتایا کہ سوشل میڈیا پر وائرل ہونے والی ویڈیوز میں ایک پرتشدد ہجوم کو ’خالصتان‘ کے پیلے بینرز لہراتے ہوئے اور ایک شخص کو عمارت کی پہلی منزل کی بالکونی سے ہندوستانی پرچم اتارتے ہوئے دکھایا گیا ہے۔ کچھ خالصتانی گروپوں کے حملے میں دو سیکورٹی گارڈز زخمی ہوئے۔