گریٹر نوئیڈا: بیوی کو جلانے کے الزام میں گرفتار وپن پولیس انکاؤنٹر میں زخمی، نکّی کے والد کا سخت ردعمل

گریٹر نوئیڈا میں نکّی قتل کیس کا اہم ملزم وپن پولیس انکاؤنٹر میں زخمی ہو گیا۔ این ڈی ٹی وی کی رپورٹ میں پولیس کے حوالہ سے بتایا گیا کہ وپن کو تفتیش کے سلسلے میں لے جایا جا رہا تھا کہ اس دوران اس نے اہلکاروں کو دھکا دے کر فرار ہونے کی کوشش کی اور پولیس پر حملہ بھی کیا۔ جواب میں پولیس نے فائرنگ کی جس سے وپن کے پیر میں گولی لگی۔ پولیس نے زخمی ملزم کو فوری طور پر اسپتال منتقل کر کے علاج شروع کرایا۔

خیال رہے کہ 28 سالہ نکّی کو مارچ میں مبینہ طور پر اُس کے شوہر وپن اور سسرالی رشتہ داروں نے زندہ جلا دیا تھا۔ نکّی بیوٹی پارلر چلاتی تھی اور اپنے کم سن بیٹے کی کفالت کر رہی تھی۔ نکّی کے والدین کا الزام ہے کہ شادی کے بعد سے ہی وپن اور اس کا خاندان 36 لاکھ روپے کے جہیز کا مطالبہ کر رہا تھا اور اسی تنازعہ کے نتیجے میں یہ دل دہلا دینے والا واقعہ پیش آیا۔

نکّی کے والد نے بیٹی کے قتل کے بعد مسلسل مطالبہ کیا کہ ملزمان کے خلاف سخت ترین کارروائی کی جائے۔ انہوں نے اس اندوہناک واردات پر سخت ردعمل دیتے ہوئے کہا تھا، ’’یہ لوگ قاتل ہیں، انہیں گولی مار دی جائے اور ان کے گھر کو بھی توڑ دینا چاہیے۔ میری بیٹی نے اکیلے محنت کر کے اپنے بچے کی پرورش کی لیکن اسے مسلسل ستایا گیا اور آخرکار قتل کر دیا گیا۔‘‘

اتوار کے روز نکّی کے والد نے یہاں تک کہا کہ حکومت کو ایسے جرائم میں ملوث لوگوں کو مڈبھیڑ میں ہلاک کر دینا چاہیے تاکہ معاشرے میں سخت پیغام جائے۔ وپن کے زخمی ہونے پر بھی انہوں نے ردعمل دیتے ہوئے کہا، ’’مجھے خوشی ہے کہ اسے گولی لگی، مگر پیر کے بجائے چھاتی پر لگنی چاہیے تھی۔‘‘

پولیس کا کہنا ہے کہ نکّی قتل کیس میں صرف وپن ہی نہیں بلکہ اس کے اہل خانہ کے دیگر افراد بھی نامزد ملزم ہیں اور تفتیش جاری ہے۔ ابھی جرم ثابت ہونا باقی ہے اور تمام قانونی تقاضے پورے کیے جا رہے ہیں۔

یہ کیس ایک بار پھر جہیز کے نام پر خواتین پر ہونے والے تشدد کے مسئلے کو اجاگر کرتا ہے۔ ماہرین کے مطابق جہیز مخالف قوانین کے باوجود ایسے واقعات کا ہونا معاشرتی رویوں میں تبدیلی کی ضرورت کو ظاہر کرتا ہے۔ انسانی حقوق کے کارکنان کا کہنا ہے کہ اس نوعیت کے جرائم میں فوری انصاف اور سخت سزا ضروری ہے تاکہ مستقبل میں ایسی وارداتیں روکی جا سکیں۔