راجستھان کے بُندی میں خوفناک سڑک حادثہ، پیدل جا رہے لوگوں پر پلٹ گیا ٹرک، 2 کی موت، متعدد زخمی

راجستھان کے بُندی ضلع میں ٹرک پلٹنے کے سبب خوفناک سڑک حادثہ پیش آیا ہے۔ اس حادثے میں 2 لوگوں کی موقع پر ہی موت ہو گئی جبکہ متعدد افراد زخمی ہو گئے ہیں۔ یہ حادثہ کوٹہ-لالسوٹ میگا ہائی وے پر میج ندی کے پاس ہوا، جس کی وجہ سے علاقے میں افراتفری مچ گئی ہے۔ موقع پر موجود لوگوں نے حادثہ میں زخمی ہونے والے لوگوں کی مدد کی۔ جبکہ پولیس نے مقامی لوگوں کی مدد سے زخمیوں کو اسپتال پہنچایا۔ لوگوں نے بتایا کہ حادثہ کا شکار ہوئے لوگ پیدل سفر کر رہے تھے۔

رپورٹس کے مطابق بُندی ضلع کے لاکھیری علاقے میں یہ سڑک حادثہ ہوا ہے۔ ’چوتھ کا برواڑہ‘ جا رہے لوگوں پر ایک ٹرک بے قابو ہو کر پلٹ گیا۔ اس دردناک حادثے میں نصف درجن سے زائد لوگ ٹرک کے نیچے دب گئے، جبکہ 2 لوگوں کی موت کی تصدیق ہوئی ہے۔

مقامی لوگوں نے بتایا کہ ٹرک کی رفتار کافی تیز تھی اور اچانک توازن بگڑنے کی وجہ سے وہ پلٹ گیا، جس کے نتیجے میں سڑک کنارے چل رہے مسافر حادثے کا شکار ہو گئے۔ حادثے کے بعد موقع پر افراتفری اور چیخ و پکار مچ گئی۔ اطلاع ملنے پر لاکھیری پولیس موقع پر پہنچی اور امدادی کارروائیاں شروع کر دیں۔ اس کے بعد 108 ایمبولینس، ریسکیو ٹیمیں اور دیگر ہنگامی خدمات جائے وقوعہ پر پہنچیں۔

واضح رہے کہ اس دردناک سڑک حادثے کے بعد جائے وقوعہ پر لوگوں کا بھاری ہجوم جمع ہو گیا اور مشتعل افراد نے میگا ہائی وے کو بلاک کر کے کلکٹر اور ایس پی کو موقع پر بلانے کا مطالبہ کیا۔ وہیں واقعے کی اطلاع ملتے ہی کئی عوامی نمائندے موقع پر پہنچ گئے ہیں۔ ایس ڈی ایم نے جائے وقوعہ کا جائزہ لیا اور بتایا کہ ’’کچھ لوگ پیدل یاترا کر رہے تھے کہ اسی دوران ایک بے قابو ٹرک پلٹ گیا، جس کی وجہ سے یہ حادثہ پیش آیا۔ واقعے کے بارے میں مزید معلومات حاصل کرنے کے لیے مقامی لوگوں سے پوچھ گچھ کی جا رہی ہے۔‘‘