’ہوگی ہر ضرورت پوری، کانگریس ہے ضروری‘، کانگریس دہلی اسمبلی انتخاب میں کامیابی کے تئیں پرعزم

دہلی اسمبلی انتخاب میں کانگریس اس بار برسراقتدار عام آدمی پارٹی اور بی جے پی کو سخت مقابلہ دیتی ہوئی محسوس ہو رہی ہے۔ ایک طرف کانگریس ان دونوں ہی پارٹیوں کی عوام مخالف پالیسیوں کو سب کے سامنے پیش کر رہی ہے، دوسری طرف حکومت تشکیل دینے کی صورت میں عوام کے لیے شروع ہونے والے خوش آئند منصوبوں کا اعلان بھی کر رہی ہے۔ ’ہوگی ہر ضرورت پوری، کانگریس ہے ضروری‘ نعرہ کے ساتھ اس مرتبہ کانگریس دہلی اسمبلی انتخاب میں کامیابی کے تئیں پرعزم نظر آ رہی ہے۔ یہی وجہ ہے کہ آج کانگریس کے ذریعہ ’جیون رکشا یوجنا‘ کا اعلان کیے جانے پر کانگریس صدر ملکارجن کھڑگے نے کہا کہ ’’دہلی کی 2 کروڑ عوام اب تبدیلی چاہتے ہے، اور وہ اس کے لیے اپنی پرانی ساتھی کانگریس پارٹی کی طرف دیکھ رہی ہے۔‘‘

قابل ذکر ہے کہ کانگریس نے دہلی اسمبلی انتخاب کی تاریخوں کا اعلان ہونے کے بعد 2 بڑے منصوبوں کا اعلان کیا ہے۔ کانگریس نے حکومت سازی کی صورت میں سب سے پہلے ’پیاری دیدی یوجنا‘ کا اعلان کیا جس کے تحت خواتین کو ہر ماہ بطور اعزازیہ 2500 روپے دیے جائیں گے، اور آج ’جیون رکشا یوجنا‘ کا اعلان ہوا جس کے تحت دہلی کے ہر شہری کو 25 لاکھ روپے کا مفت ہیلتھ سیکورٹی انشورنس ملے گا۔

کانگریس کے قومی صدر ملکارجن کھڑگے نے آج کانگریس کے ان دونوں منصوبوں کا تذکرہ کرتے ہوئے ایک پوسٹ کیا ہے جس میں لکھا ہے کہ ’’ہم نے 2 اہم اعلانات کیے ہیں۔ 1. پیاری دیدی یوجنا: خواتین کو ہر ماہ 2500 روپے کی اعزازیہ رقم۔ 2. جیون رکشا یوجنا: دہلی کے ہر شہری کو 25 لاکھ روپے کا مفت ہیلتھ سیکورٹی انشورنس۔‘‘ وہ مزید لکھتے ہیں کہ ’’دہلی ہندوستان کی شناخت ہے۔ یہاں کی خوشحالی ملک کی خوشحالی ہے۔ عوامی فلاح، سماجی انصاف اور دہلی کی معاشی و بنیادی ترقی کو لوٹانے کے لیے کانگریس ہی واحد متبادل ہے۔ اس لیے صرف کانگریس کو ووٹ دیں۔‘‘

کانگریس بی جے پی اور عآپ کی لیڈرشپ کو بھی لگاتار نشانے پر لے رہی ہے۔ خصوصاً سوشل میڈیا پر ان کے حقائق پیش کیے جا رہے ہیں تاکہ عوام تک ان کی سچائی پہنچائی جا سکے۔ ’ایکس‘ پر پوسٹ کردہ ایک ویڈیو میں کانگریس نے کہا ہے کہ ’’دیش کے دل پر چوٹ کرنے والوں کو دہلی کی عوام معاف نہیں کرے گی۔ واشنگ مشین اور شیش محل والوں کی بدعنوانی نے دہلی کی عوام کو بے حال کر دیا ہے۔ لیکن اب اور نہیں۔ ان کی بدعنوانی کو مٹانا ہی کانگریس پارٹی کا عزم ہے۔‘‘

ایک دیگر ویڈیو پوسٹ میں کانگریس نے بتایا ہے کہ ’’گزشتہ 11 سالوں میں ایک ناکارہ حکومت نے دہلی کی قسمت میں محلہ کلینک کے نام پر ناکارہ صحت خدمات، اسپتالوں کے نام پر بدحالی اور علاج کے نام پر زبردست بدانتظامی لکھ دی ہے۔ جس کا نتیجہ کورونا میں مچے کہرام کی شکل میں ہم سب نے دیکھا۔ کورونا کے اس دور میں بھی کانگریس سب کی ذمہ داری نبھا رہی تھی اور دہلی والوں کو آکسیجن سلنڈر، دوائیاں اور کھانا مہیا کرا رہی تھی۔‘‘ اس میں مزید کہا گیا ہے کہ ’’دہلی کو پھر سے ایسی مشکلات کا سامنا نہ کرنا پڑے، اس کے لیے ہماری سی پی پی چیئرپرسن سونیا گاندھی، کانگریس صدر ملکارجن کھڑگے، ہمارے لیڈر راہل گاندھی کے مشورہ سے کانگریس نے دہلی کے ہر شخص کو 25 لاکھ روپے تک کا مفت علاج دینے کا فیصلہ لیا ہے۔ یہ منصوبہ دہلی کے ہر نوجوان، بچے، بزرگ، خواتین، مرد کو پرائیویٹ اسپتالوں میں بھی 25 لاکھ روپے تک کے مفت علاج کا حق دے گی۔ کانگریس دہلی والوں سے یہ وعدہ نبھائے گی، کیونکہ اس سے پہلے کانگریس راجستھان سے یہ وعدہ نبھا چکی ہے۔‘‘

کانگریس نے 25 لاکھ روپے تک کے مفت علاج سے متعلق منصوبہ کو لے کر مزید ایک ویڈیو ’ایکس‘ پر پوسٹ کی ہے۔ اس میں بتایا گیا ہے کہ ’’دہلی میں اب کوئی بھی کنبہ علاج اور اس کے خرچ کو لے کر پریشان نہیں ہوگا۔ کیونکہ کانگریس دہلی کے باشندوں کے لیے ’جیون رکشا یوجنا‘ لے کر آئی ہے جس میں لوگوں کو 25 لاکھ روپے تک کا صحت انشورنس ملے گا۔ تبھی ہم کہہ رہے ہیں– ہوگی ہر ضرورت پوری، کانگریس ہے ضروری۔‘‘