دہلی اسمبلی الیکشن: غیر جانبدارانہ انتخاب کو یقینی بنانے کے لیے چیف الیکٹورل افسر کی سیاسی پارٹیوں کے ساتھ میٹنگ

نئی دہلی: دہلی اسمبلی انتخاب کے لیے تاریخوں کا اعلان ہوتے ہی سیاسی سرگرمیاں بھی تیز ہو گئی ہیں۔ اس درمیان دہلی کی چیف الیکٹورل افسر (سی ای او) آر. ایلس واز نے آج قومی و ریاستی منظور شدہ سیاسی پارٹیوں کے ساتھ ایک اہم میٹنگ کی۔ اس میٹنگ میں انھوں نے سیاسی پارٹیوں کے نمائندوں کے ساتھ آزادانہ، غیر جانبدارانہ و شفاف انتخاب کو یقینی بنانے پر گفتگو کی۔ ساتھ ہی انھوں نے مثالی ضابطہ اخلاق (ماڈل کوڈ آف کنڈکٹ) اور انتخابی اخراجات کی نگرانی سے متعلق ترکیبوں اور کارگزاریوں پر پارٹیوں کو جانکاری دی۔

میٹنگ سے متعلق چیف الیکٹورل افسر دہلی کے دفتر نے جانکاری دیتے ہوئے بتایا کہ ایلس واز نے سیاسی پارٹیوں کے نمائندوں سے مثالی ضابطہ اخلاق پر عمل کرنے کی گزارش کی اور اس کی اہمیت پر زور دیا۔ ظاہر ہے انتخابی ضابطہ اخلاق الیکشن کمیشن کے ذریعہ انتخاب کی تاریخوں کا اعلان کرتے ہی نافذ ہو چکا ہے۔ اس میٹنگ میں دہلی کی چیف الیکٹورل افسر نے سیاسی مہموں، اخلاقی روایات اور انتخابی طریقہ کار کو رخنہ انداز کرنے والی سرگرمیوں کے امتناع کے لیے اہم ہدایات پر روشنی ڈالی۔

دی گئی جانکاری کے مطابق اس میٹنگ میں عام آدمی پارٹی، بہوجن سماج پارٹی، بی جے پی، سی پی آئی (ایم)، کانگریس، نیشنل پیپلز پارٹی کے نمائندوں نے شرکت کی۔ سبھی کے سامنے دہلی چیف الیکٹورل افسر نے انتخابی اخراجات کی نگرانی کی ترکیبوں کو نشان زد کیا جس میں اخراجات پر نظر رکھنے کے لیے مبصرین کی تقرری، نگرانی ٹیم اور خلاف ورزی پر نظر رکھنے کے لیے کنٹرول روم کا قیام شامل ہے۔ انھوں نے سیاسی پارٹیوں سے مہم کے دوران رقم کے استمال میں شفافیت برقرار رکھنے اور مقررہ مدت کار کے اندر اخراجات کی تفصیل پیش کرنے کی گزارش کی۔