ہماچل: کلو میں بس کھائی میں گرنے سے 16 افراد کی موت، وزیر اعظم اور پرینکا گاندھی کا اظہار رنج و غم

شملہ: ہماچل پردیش کے کلو میں پیر کی صبح ایک مسافر بس گہری کھائی میں گر جانے سے کم از کم 16 افراد کی موت اور متعدد زخمی ہو گئے، بس میں مجموعی طور پر 45 افراد سوار تھے۔ وزیر اعظم نریندر مودی اور کانگریس کی جنرل سکریٹری پرینکا گاندھی نے واقعہ پر رنج و غم کا اظہار کیا ہے۔

موصولہ اطلاع کے مطابق یہ حادثہ تقریباً 8.30 بجے اس وقت پیش آیا جب شین شر سے سینج کی طرف آ رہی بس گرل کے قریب موڑ پر بے قابو ہوکر سڑک کے نیچے کھائی میں گر گئی۔ اس میں اسکول کے بچے بھی سوار تھے۔ واقعہ کی اطلاع ملتے ہی پولیس اور ریسکیو ٹیمیں موقع پر پہنچ گئیں اور امدادی کارروائیاں شروع کر دیں۔

کلو میں پیش آنے والے دلخراش حادثہ پر وزیر اعظم نریندر مودی نے رنج و غم کا اظہار کیا ہے۔ وزیر اعظم نے ٹوئٹ کیا، ’’ہماچل پردیش کے کلو میں پیش آنے والا حادثہ دل دہلا دینے والا ہے۔ غم کے ان لمحات میں غمزدہ کنبوں سے میری تعزیت۔ مجھے امید ہے کہ جو زخمی ہیں وہ جلد از جلد صحت یاب ہوں گے۔ مقامی انتظامیہ متاثرہ افراد کی ہر ممکن امداد کر رہی ہے۔‘‘

وزیراعظم مودی نے کلو بس حادثہ میں جان گنوانے والوں کے لواحقین کو 2-2 لاکھ روپے اور زخمیوں کو پچاس ہزار روپے دینے کا کیا اعلان کیا ہے۔

وہیں کانگریس کی جنرل سکریٹری پرینکا گاندھی نے ٹوئٹ کیا، ’’کلو ہماچل پردیش میں ہونے شدید سڑک حادثہ میں اسکولی بچوں سمیت مقامی لوگوں کی موت کی خبر سن کر دل کو تکلیف پہنچی۔ خدا جان گنوانے والوں کی روحوں کو سکون دے۔ مہلوکین کے اہل خانہ سے میری گہری تعزیت۔ میں زخمیوں کے جلد صحت یاب ہونے کی تمنا کرتی ہوں۔‘‘