دہلی میں موسلا دھار بارش، لوگوں کو دفتر پہنچنے میں ہوئی دقت

نئی دہلی: قومی دارالحکومت میں منگل کی صبح تیز ہوا کے ساتھ تیز بارش ہوئی، جس کی وجہ سے کئی علاقوں میں جام لگ گیا اور لوگوں کو دفتر پہنچنے میں کافی دقتوں کا سامنا کرنا پڑا۔ قومی راجدھانی دہلی کے کچھ حصوں میں بھاری بارش ہوئی جبکہ کچھ حصوں میں بوچھاریں پڑیں۔

بھاری بارش کی وجہ سے کئی علاقوں میں درخت اکھڑ گئے جس کی وجہ سے نقل و حمل متاثر ہوئی۔ ساؤتھ دہلی میں ایک درخت کے اکھڑ جانے کے بعد مہارانی باغ سے آشرم کی طرف جانے والے راستے پر گاڑیوں کی آمد و رفت متاثر ہوئی۔ ایک گاڑی میں تکنیکی خامی کے سبب دھولا کنواں سے لے کر ایمس تک ٹریفک متاثر ہوا۔

پانی کے بھراؤ کی وجہ سے ماڈل ٹاؤن میں بھی جام کی صورت حال رہی جبکہ اندر پرستھ فلائی اوور کے نزدیک اوور فلو ہو رہے سیور کی وجہ سے گاڑیوں کی آمد و رفت متاثر ہو گئی۔ پانی کے بھراؤ کی وجہ سے لوگوں کا دواریکا اور گڑگاؤں میں اپنے اپنے گھروں سے باہر نکلنا مشکل ہو گیا۔

محکمہ موسمیات نے بتایا کہ یہاں صبح ساڑھے آٹھ بجے تک 12.6 ملی میٹر بارش ہوئی اور کم از کم درجہ حرارت 26.7 ڈگری سیلسیس ریکارڈ کیا گیا، جو اس موسم کا عمومی درجہ حرارت ہے۔ محکمہ موسمیات کے مطابق یہاں پر صبح ساڑھے آٹھ بجے تک نمی کی سطح 97 فیصد رہی۔

راجدھانی دہلی میں بھاری بارش کے ساتھ عام طور پر دن میں بادل چھائے رہنے کے آثار ہیں۔ آج یہاں زیادہ سے زیادہ درجہ حرارت 33 ڈگری سینٹی گریڈ کے آس پاس رہنے کی امید ہے۔ دہلی میں پیر کو زیادہ سے زیادہ درجہ حرارت 37.4 ڈگری سیلسیس ریکارڈ کیا گیا تھا، جو موسم کے مطابق تین ڈگری سینٹی گریڈ زیادہ تھا۔

(یو این آئی ان پٹ کے ساتھ)