گلوکارہ نیہا سنگھ راٹھور کے خلاف ’ہنومان سینا‘ نے وارانسی میں درج کرائی ایف آئی آر، مودی کے خلاف نازیبا تبصرہ کا الزام

بہار کی لوک گلوکارہ نیہا سنگھ راٹھور ایک بار پھر مشکل میں پھنستی ہوئی نظر آ رہی ہیں۔ وارانسی کے لنکا تھانہ میں نیہا سنگھ راٹھور کے خلاف مقدمہ درج کیا گیا ہے۔ ہنومان سینا (سماجی تنظیم) کے صدر سدھیر سنگھ نے لوک گلوکارہ کے خلاف ایف آئی آر درج کرائی ہے۔ نیہا سنگھ پر اپنی ویڈیو میں وزیر اعظم نریندر مودی کے خلاف نازیبا تبصرہ کرنے کا الزام ہے۔

نیہا سنگھ راٹھور پر الزام ہے کہ وارانسی کے رکن پارلیمنٹ اور ملک کے وزیر اعظم نریندر مودی کے بارے میں انہوں نے توہین آمیز ویڈیو بنائی ہے۔ ساتھ ہی ویڈیو میں وزیر اعظم کے خلاف تضحیک آمیز الفاظ بھی استعمال کیے گئے ہیں۔ ان پر یہ بھی الزام ہے کہ وہ ایسی ویڈیو بنا کر پاکستان میں وائرل کر رہی ہیں۔ شکایت کنندہ نے کہا کہ ’’بہار کی لوک گلوکارہ نیہا سنگھ راٹھور مسلسل وزیر اعظم مودی کے خلاف تضحیک آمیز ویڈیو بنا رہی ہیں، جو نہ صرف وارانسی کے عوام بلکہ پورے ملک کی توہین ہے۔‘‘ ساتھ ہی انہوں نے کہا کہ نیہا سنگھ راٹھور اس ویڈیو کو پاکستان میں وائرل کر رہی ہیں جو کہ غداری کے زمرے میں آتا ہے۔

شکایت کنندہ کے مطابق وزیر اعظم مودی کے خلاف لوک گلوکارہ کی بنائی گئی ویڈیو اس وقت پاکستان کی میڈیا اور ٹی وی پر مسلسل نشر کی جا رہی ہے۔ شکایت کنندہ نے یہ بھی کہا کہ ہندوستان میں رہنے والے غدار بھی نیہا سنگھ راٹھور کی مالی مدد کر کے ان کی ویڈیو کو مسلسل وائرل کر رہے ہیں۔ شکایت کرنے والے نے اپیل کی ہے کہ غدار نیہا سنگھ راٹھور کے خلاف غداری جیسی سنگین دفعات کے تحت مقدمہ درج کیا جائے۔ قابل ذکر ہے کہ حال ہی میں جموں و کشمیر کے پہلگام میں ہوئے دہشت گردانہ حملہ پر بھی نیہا سنگھ راٹھور نے ایک ویڈیو بنایا تھا۔ اس ویڈیو کی وجہ سے لکھنؤ کے حضرت گنج تھانہ میں غداریٔ وطن اور آئی ٹی ایکٹ کے تحت ان کے خلاف ایف آئی آر درج کی گئی تھی۔