آلودگی سے نمٹنے کے لیے گروگرام کی سوسائٹی نے خود ہی بنالی ’بارش‘، وائرل ویڈیو پر ملا جُلا ردعمل

 قومی راجدھانی دہلی سے ملحق ہریانہ کے گروگرام میں ایک شخص کا ویڈیو سوشل میڈیا پر تیزی سے وائرل ہورہا ہے جس میں ایک ہاؤسنگ سوسائٹی کو فضائی آلودگی سے نمٹنے کے لیے مصنوعی بارش کرتے ہوئے دکھایا گیا ہے۔ اس ویڈیو نے اس لئے لوگوں کی توجہ اپنی طرف مبذول کرائی کیونکہ جب پورا شہر خراب ہوا کے معیار (اے کیو آئی) سے پریشان ہے، یہ سوسائٹی اپنے طور پر آلودگی کو کم کرنے کی کوشش کررہی ہے۔

اس ویڈیو کو راہل یادو نامی شخص نے انسٹاگرام پر شیئر کیا ہے۔ انہوں نے کیپشن میں لکھا ہے کہ ’گروگرام کی یہ سوسائٹی مصنوعی بارش کے ذریعے ہوا کے معیار کو بہتر بنائے رکھتی ہے‘۔ ان کا کہنا ہے کہ جب پورا شہر سانس لینے کی جدوجہد کر رہا ہے، تب یہ جگہ اپنی ’ خود کی بارش‘ بنا کر آلودگی سے لڑ رہی ہے۔

ویڈیو میں دکھایا گیا ہے کہ سوسائٹی کی عمارتوں کی چھتوں پر اسپرینکلرز نصب ہیں جو ہوا میں پانی کے باریک اسپرے کرتے ہیں، جس سے ایسا لگتا ہے جیسے ہلکی بارش ہو رہی ہو۔ اس پانی کی وجہ سے ہوا میں موجود گرد و غبار اور آلودگی کے ذرات نیچے بیٹھ جاتے ہیں جس سے ارد گرد کی ہوا کچھ حد تک صاف ہو جاتی ہے۔ ویڈیو میں اس نظام کو مختلف زاویوں سے دکھایا گیا ہے۔ سوسائٹی کے سرسبز باغات، صاف ستھرے لان اور چوڑے پیدل راستے بھی نظر آتے ہیں۔ ہریالی دیکھ کر صاف ظاہرہوتا ہے کہ اس اقدام نے سوسائٹی کے ماحول کو صاف ستھرا اور رہنے کے قابل بنا دیا ہے۔

اس ویڈیو پر ملا جلا ردعمل سامنے آیا ہے۔ کچھ لوگوں نے سوال اٹھایا کہ حکومت نے دیگر سوسائٹیوں اور دفاتر میں ایسا نظام کیوں نافذ نہیں کیا۔ وہیں بہت سے صارفین نے اس اقدام کی تعریف کرتے ہوئے کہا کہ ترقی کے ساتھ ساتھ ماحولیاتی تحفظات بھی ضروری ہیں۔ کچھ لوگوں نے یہ سوال بھی کیا کہ کیا اتنا بڑا سسٹم ہرجگہ نصب کرنا ممکن ہے اور اس پر کتنی لاگت آئے گی۔ مجموعی طور پر گروگرام کی اس سوسائٹی کی کوشش نے یہ ثابت کیا ہے کہ مقامی سطح پر بھی فضائی آلودگی سے نمٹنے کے لیے اختراعی اور تخلیقی طریقے اپنائے جا سکتے ہیں۔