کورونا سے پریشان گجرات حکومت کا ’یو ٹرن‘، اسکول رہیں گے بند، احمد آباد میں رات کا کرفیو

ہندوستان کی کچھ ریاستوں میں کورونا کے معاملے لگاتار بڑھ رہے ہیں، جن میں گجرات بھی شامل ہے۔ گجرات حکومت نے کورونا سے پیدا مشکل حالات کے پیش نظر اسکول، کالج اور یونیورسٹیوں کو دوبارہ کھولنے کے فیصلے پر یو-ٹرن لے لیا ہے۔ ساتھ ہی حکومت نے ریاست کی معاشی راجدھانی احمد آباد میں رات 9 بجے سے صبح 6 بجے تک کرفیو نافذ کرنے کا بھی فیصلہ کیا ہے۔ ریاستی حکومت نے جمعرات کی شب تعلیمی اداروں سے متعلق اپنے بیان میں کہا کہ اسکول و کالج کو پھر سے کھولنے کے فیصلے کو ’ملتوی‘ کر دیا گیا ہے۔

واضح رہے کہ دیوالی تہوار کے بعد خصوصی طور پر احمد آباد میں کورونا وائرس کے معاملے تیزی سے ب ڑھے ہیں۔ لہٰذا حکومت نے 11 نومبر کو صلاح و مشورہ کر کے 23 نومبر کو اسکولوں، کالجوں اور یونیورسٹیوں کو پھر سے کھولنے کا فیصلہ کرتے ہوئے اس سلسلے میں ہدایات بھی جاری کر دی تھی۔

وزیر تعلیم بھوپندر سنگھ چوڈاساما نے پہلے سلسلہ وار طریقے سے تعلیمی اداروں کو کھولنے کی بات کہی تھی، ساتھ ہی آن لائن ایجوکیشن جاری کرھنے کی ہدایت بھی دی تھی۔ حالانکہ پرائمری اسکولوںک و پھر سے کھولنے پر کوئی فیصلہ نہیں ہوا تھا۔ حکومت نے کہا تھا کہ وہ 11 نومبر کے فیصلے پر عمل کیے جانے کے بعد حالات کو دیکھتے ہوئے آگے کا فیصلہ لے گی۔ حکومت کے اس قدم کی عوام میں کافی تنقید بھی ہوئی تھی۔ بالآخر حکومت کو اپنا فیصلہ واپس لینا پڑا۔