جگن موہن ریڈی کے خلاف ایف آئی آر، قافلے کی گاڑی سے ٹکرا کر ایک شخص کی موت کے معاملے کی جانچ شروع

آندھرا پردیش کے سابق وزیر اعلیٰ اور وائی ایس آر سی پی کے سربراہ جگن موہن ریڈی پر سڑک حادثے میں ایک شخص کو کچلنے کا الزام لگا ہے۔ پولیس کے مطابق پالناڈو میں رینتا پلاّ گاؤں کی طرف جاتے ہوئے جگن موہن ریڈی کی گاڑی سے ٹکرا کر ایک شخص حادثے کا شکار ہو گیا اور اس نے موقع پر ہی دم توڑ دیا۔

گنٹور کے ایس پی ستیش کمار نے پریس کانفرنس کرکے معاملے کی اطلاع دی۔ انہوں نے بتایا کہ اتوار کو ایک ضعیف شخص سنگیا کا حادثہ ہو گیا تھا۔ وہ بُری طرح سے زخمی تھے اور ان کے جسم سے کافی خون نکل رہا تھا۔ جب اسے اسپتال لے جایا گیا تو ڈاکٹروں نے اسے مردہ قرار دے دیا۔

پولیس کے مطابق وائی ایس آر سی پی کے ایک رہنما نے گزشتہ سال خودکشی کرلی تھی، ان کے کنبہ نے سابق وزیر اعلیٰ کو بلاوا بھیجا تھا۔ اسی سلسلے میں جگن موہن ریڈی رینتا پلّا واقع اس رہنما کے گھر جا رہے تھے، تبھی راستے میں ان کی گاڑی سے سنگیا کا حادثہ ہو گیا۔

مہلوک کی اہلیہ چیلی لُردھو میری نے مقامی پولیس تھانے میں شکایت درج کرائی ہے۔ پولیس نے بی این ایس کی دفعہ 106 (1) کے تحت معاملہ درج کر لیا ہے۔ معاملہ سامنے آنے کے بعد پولیس نے سی سی ٹی وی فوٹیج، ڈرون سمیت سبھی طرح کے ثبوت یکجا کیے۔ ان میں صاف طور پر دیکھا جا سکتا ہے کہ مہلوک سابق وزیراعلیٰ کے قافلہ کے بیچ میں آ گیا تھا، جس کی وجہ سے یہ حادثہ پیش آیا۔

پولیس نے اسبق وزیر اعلیٰ جگن موہن ریڈی کے علاوہ ان کے ڈرائیور رمنا ریڈی، پرسنل اسسٹنٹ کے ناگیشور ریڈی اور سینئر وائی ایس آر سی پی وائی وی سبا ریڈی، سابق ایم ایل اے پیرنی وینکٹ رمیا اور سابق وزیر ودادلا رجنی کمار کے خلاف معاملہ درج کیا ہے۔