جھنڈا پھہرانے کے بعد تصویر کھینچوانے کے دوران گرپڑے آبکاری افسر، ہارٹ اٹیک سے موت

مہاراشٹر کے دھاراشیو ضلع میں ایک افسوسناک واقعہ پیش آیا ہے۔ یہاں یوم جمہوریہ کی تقریب کے دوران اچانک ایک آبکاری افسرگرپڑے۔ بتایا جا رہا ہے کہ تقریب کے دوران انہیں دل کا دورہ پڑا جس سے ان کی موت ہوگئی۔ وہاں موجود افسران نے بتایا کہ اومیرگہ تحصیل میں تلمود سرحدی چوکی پر پرچم کشائی کا پروگرام منعقد کیا گیا تھا۔ تقریب کے بعد 56 سالہ موہن جادھو یہاں ملازمین کے ساتھ گروپ فوٹو کے لیے کھڑے تھے کہ اچانک ان کی طبیعت خراب ہوگئی اور وہ وہیں گر گئے۔

خبر رساں ایجنسی پی ٹی آئی کی رپورٹ کے مطابق موہن جادھو کو اومیرگہ سول اسپتال لے جایا گیا، جہاں علاج کے دوران ان کی موت ہوگئی۔ ڈاکٹروں نے بتایا کہ افسر کو دل کا دورہ پڑا تھا۔ وہ سولاپور کے پرتاپ نگر علاقہ کے رہنے والے تھے۔ ایک عینی شاہد کے ذریعہ موبائل فون سے بنائی گئی ویڈیو میں موہن جادھو کو اپنا توازن کھوکر گرتے ہوئے دیکھا جا سکتا ہے۔ ویڈیو میں دیکھا گیا ہے کہ موہن جادھو کے ساتھی ان کے گرتے ہی ان کی مدد کے لیے دوڑ پڑے۔ افسر کو فوری طور پر اسپتال لے جایا گیا لیکن وہاں پہنچنے تک بہت دیر ہو چکی تھی۔ ڈاکٹر نے انہیں مردہ قرار دے دیا۔

موہن جادھو کے انتقال کی خبران کےاہل خانہ کو دی گئی۔ متاثرہ خاندان میں اس خبرسے سوگ کی لہردوڑ گئی۔ ان کا کہنا ہے کہ موہن جادھو بالکل صحت مند تھے اور وہ صبح تیار ہوکر تقریب کے لیے روانہ ہونے تھے۔ اگر انہیں کوئی پریشانی بھی تھی تو انہوں نے کسی کو نہیں بتایا تھا۔ وہیں ان کے ساتھیوں نے انہیں ایک ڈسپلن اور محنتی افسر کے طور پر یاد کیا۔