کسانوں کے ساتھ فریب اور دھوکہ کی مثالیں دن بہ دن بڑھتی جا رہی ہیں: ہائی کورٹ

اورنگ آباد: کسانوں کے ساتھ فریب اور دھوکہ دہی کی مثالیں دن بدن بڑھتی ہی جارہی ہیں، اور کسانوں کو درپیش مسائل کے حل کے لیے انتظامیہ سنجیدہ نہیں ہے۔ اس طرح کا مشاہدہ ایک خاتون کو زیادہ قیمت پر زرعی پیداوار فروخت کرنے کا تیقن دے کر 2 کروڑ 80 لاکھ روپیوں کی دھوکہ دیہی کرنے والے ملزمین کی درخواست ضمانت مسترد کرتے ہوئے بمبئی ہائی کورٹ کی اورنگ آباد بینچ نے کیا۔

بمبئی ہائی کورٹ اورنگ آباد بینچ کے جسٹس ٹی وی نلواڑے اور جسٹس ایم جی سیولیکر کی ڈویژن بینچ نے اپنے ایک حالیہ فیصلے میں جلگاؤں میں مقیم کاروباری افراد کی جانب سے کاشتکاروں کو دھوکہ دہی کرنے والے ملزمان کے خلاف درخواست کی سماعت کے دوران مشاہدہ کیا کہ کسانوں کو دھوکہ دینے کے واقعات میں روز بروز اضافہ ہوتا جارہا ہے۔ اور یہ ایک حقیقت ہے کہ انتظامیہ کسانوں کے خلاف ایسے معاملات اور ان کی مشکلات کو حل کرنے میں سنجیدگی کا مظاہرہ نہیں کرری ہیں۔

عدالت نے کہا کہ چونکہ کسانوں کے پاس وسائل کی کمی ہے اور وہ قانونی چارہ جوئی کا متحمل نہیں ہوسکتے ہیں، اسی لیے اس کمزوری کا فائدہ تاجران اٹھا رہے ہیں۔ عدالت نے کہا کہ "کسانوں کی خودکشیوں میں روز بروز اضافہ ہوتا جارہا ہے کیونکہ کاشتکاروں کو ہر طرح کی پریشانیوں کا سامنا ہے۔ اور دھوکہ دہی کا موجودہ مسئلہ اضافی صورتحال ہے جو کسانوں کو خودکشی پر مجبور کر رہا ہے۔ ان تمام حالات کی وجہ سے، اس عدالت کا موقف ہے کہ درخواست دہندگان کے حق میں کوئی راحت نہیں دی جاسکتی۔"

واضح رہے کہ اس معاملے میں درخواست دہندگان میں کیلاش چندر کھنڈوال، اس کا بیٹا میور کھنڈوال اور ان کا اکاؤنٹنٹ عقیل شیخ شامل ہیں۔ مذکورہ مقدمہ ان کے خلاف ساوڈا پولیس اسٹیشن، ضلع جلگاؤں میں دفعہ 420، 406، 120-B اور 34 کے تحت تعزیرات ہند کی دفعات کے تحت درج کیا گیا تھا۔

اس معاملے میں شکایت کرنے والی 23 سالہ ثانیہ قادری کی شکایت کے مطابق، مطابق، 9 اپریل، 2017 کو، میور کھنڈوال نے اس سے ساوڈا میں ملاقات کی اور اس کے پاس کسانوں کی کیلوں کی زرعی پیداوار کو اچھی قیمت اور زیادہ نفع کے ساتھ فروخت کرنے کا جھانسہ دیا۔ جس کے اگلے دن ایک معاہدہ کیا گیا۔اور 21 مئی، 2017 سے 18 جون، 2017 تک، درخواست دہندگان کو کو کیلوں کی فراہمی کی جاتی رہی، لیکن اس رقم اسے نہں دی گئی۔اور ان ملزمین درخواست دہندگان نے اسے تقریبا دو کروڑ 80 لاکھ کا دھوکہ دیا ہے۔