کورونا وائرس: آر ایس ایس کی بنگلورو میں منعقد ہونے والی میٹنگ رد

ملک بھر میں پھیل رہے کورونا وائرس کو دیکھتے ہوئے آر ایس ایس نے اتوار سے بنگلورو میں شروع ہونے والی سہ روزہ میٹنگ کو رد کرنے کا فیصلہ کیا ہے۔ یہ میٹنگ آر ایس ایس کی ’کل ہند ایوان نمائندگان‘ کی سالانہ میٹنگ تھی۔ میٹنگ رد کرنے کی جانکاری خود آر ایس ایس کے سرکردہ لیڈر بھیا جی جوشی نے دی۔ بھیا جی جوشی کا کہنا ہے کہ ابھی پورے ملک میں کورونا وائرس کا خطرہ پھیلا ہوا ہے۔ انتظامیہ کے ذریعہ گزارش کیے جانے کے بعد اب سبھی کو اس کی روک تھام میں لگنا ہے، لہٰذا ایوانِ نمائندگان کی میٹنگ فی الحال رد کی جاتی ہے۔ ساتھ ہی بھاجی جوشی نے آر ایس ایس ورکروں سے کہا ہے کہ اس بیماری کی روک تھام کے لیے انتظامیہ کے ساتھ تعاون کریں اور بیداری لائیں۔

غور طلب ہے کہ آر ایس ایس کی یہ سہ روزہ سالانہ میٹنگ اتوار کو بنگلورو میں طے تھی۔ کل ہند ایوان نمائندگان آر ایس ایس کا فیصلہ لینے والا سرکردہ ادارہ ہے۔ آر ایس ایس اور اس کی ذیلی تنظیموں کے 1500 منتخب نمائندگوں کی اس میٹنگ میں شرکت کی امید تھی۔ مانا جا رہا تھا کہ آر ایس ایس میٹنگ کے دوران اپنے 15 لاکھ سویم سیوکوں کو سماج میں مثبت تبدیلی لانے کے لیے سرگرم کرنے کے بارے میں کوئی فیصلہ کرتا۔

قابل ذکر ہے کہ اس میٹنگ میں آئندہ ایک سال کے لیے تنظیم کا خاکہ تیار کیا جاتا۔ میٹنگ میں بی جے پی کے قومی صدر جے پی نڈّا اور تنظیم کے جنرل سکریٹری بی ایل سنتوش کو بھی شامل ہونا تھا۔