ڈیجیٹل اریسٹ کے نام پر 300 کروڑ کی سائبر ٹھگی، دبئی اور چین سے جڑے تار، ’سورت ماڈیول‘ کا انکشاف

احمد آباد: گجرات پولیس کی سائبر کرائم برانچ نے ملک بھر میں پھیلے ایک بڑے ’ڈیجیٹل اریسٹ‘ گھوٹالے کا پردہ فاش کیا ہے۔ پولیس کے مطابق یہ بین الاقوامی سطح پر منظم نیٹ ورک ہے، جس میں دبئی اور چین میں بیٹھے گروہ شامل ہیں۔ اس ریکٹ نے اب تک ملک بھر میں کروڑوں روپے کی سائبر ٹھگی کو انجام دیا ہے۔

احمد آباد کے جوائنٹ سی پی (کرائم) شرد سنگھل نے پریس کانفرنس میں بتایا کہ ابھی تک صرف ’سورت ماڈیول‘ کا انکشاف ہوا ہے۔ انہوں نے کہا کہ اس سال جنوری میں احمد آباد سائبر کرائم برانچ نے 54 لاکھ روپے کی دھوکہ دہی کے ایک معاملے کی جانچ کے دوران اس گروہ کا سراغ لگایا تھا۔ اب تک اس نیٹ ورک سے جڑے 7 افراد کی شناخت ہو چکی ہے، جن میں سے کچھ کو پولیس نے حراست میں لیا ہے اور کچھ عدالتی حراست میں ہیں۔

انہوں نے مزید کہا کہ گجرات کے گاندھی دھام اور احمد آباد میں بھی اس گروہ کے خلاف شکایات درج ہوئیں۔ احمد آباد میں ایک متاثرہ سے 32 لاکھ روپے اور گاندھی دھام میں ایک دیگر متاثرہ سے 1.5 کروڑ روپے ہتھیائے گئے۔ پورے ملک میں اب تک اس گروہ کے خلاف 404 شکایات درج ہیں، جن میں صرف دو کیسوں میں 16 کروڑ روپے کی آن لائن ٹھگی سامنے آئی ہے۔

تحقیقات میں یہ بات بھی سامنے آئی کہ ملزمان دھوکہ دہی سے حاصل رقم کو پہلے ڈمی بینک اکاؤنٹس میں جمع کرتے تھے۔ اس کے بعد وہ رقم کو ’ہنڈی حوالہ‘ اور کرپٹو کرنسی کے ذریعے بیرون ملک منتقل کر دیتے تھے۔ پولیس کے مطابق سورت سے گروہ کے کارندے پیسہ ناصر اور برج لال کے پاس بھیجتے تھے۔ یہ دونوں رقم کو کرپٹو میں بدل کر دبئی میں بیٹھے ملزم ’ملن‘ کو پہنچاتے تھے۔ ملن دراصل چین میں موجود سائبر گروہ کے لیے کام کرتا ہے اور انہی کو کرپٹو والیٹ فراہم کرتا تھا۔

شرد سنگھل نے بتایا کہ جانچ کے دوران اب تک 300 کروڑ روپے سے زیادہ کی مشکوک ٹرانزیکشن کا سراغ ملا ہے۔ ان کا کہنا تھا کہ ’’ہمیں لگتا ہے کہ ابھی صرف سورت ماڈیول سامنے آیا ہے لیکن ملک کے دیگر حصوں میں بھی کئی ماڈیول سرگرم ہو سکتے ہیں جنہیں دبئی میں بیٹھا ملن چین کے گینگ کے لیے چلاتا ہے۔‘‘

پولیس نے یہ بھی واضح کیا کہ یہ پہلا موقع ہے جب اس کیس میں ’گُجسِٹوک‘ یعنی گجرات کنٹرول آف ٹیررزم اینڈ آرگنائزڈ کرائم ایکٹ کے تحت معاملہ درج کیا گیا ہے۔ اب تک گرفتار شدگان میں ساونت اور گووند پولیس حراست میں ہیں، جبکہ دھول اور برج راج عدالتی حراست میں بھیجے گئے ہیں۔ کولے اور ہسمکھ دونوں کو ضمانت مل چکی تھی لیکن پولیس انہیں دوبارہ حراست میں لینے کی کارروائی کر رہی ہے۔

سائبر کرائم برانچ کے مطابق یہ بین الاقوامی نیٹ ورک نہ صرف مالی نقصان کا باعث بن رہا ہے بلکہ ملک کی سائبر سکیورٹی کے لیے بھی ایک بڑا خطرہ ہے۔ پولیس نے عوام کو خبردار کیا ہے کہ وہ کسی بھی انجان کال یا ’ڈیجیٹل اریسٹ‘ کے جھانسے میں نہ آئیں اور کسی بھی مشتبہ معاملے کی فوراً اطلاع دیں۔