ووٹ چوری پر عوامی حمایت سے بوکھلائی بی جے پی کے اشارے پر پولیس نے کانگریس کارکنوں کو حراست میں لیا: دیویندر یادو

نئی دہلی: دہلی پردیش کانگریس کمیٹی کے صدر دیویندر یادو نے کہا ہے کہ ووٹ چوری کے خلاف کانگریس کی دستخطی مہم کو دہلی بھر میں مل رہی زبردست عوامی حمایت سے بھارتیہ جنتا پارٹی (بی جے پی) خوفزدہ ہو گئی ہے۔ ان کا کہنا ہے کہ اسی بوکھلاہٹ میں پولیس نے بی جے پی کے اشارے پر کانگریس کارکنوں کو زبردستی حراست میں لینا شروع کر دیا ہے۔

دیویندر یادو نے کہا، ’’ہم راہل گاندھی کے ببر شیر ہیں، ڈرنے والے نہیں۔ بی جے پی کی حکومت اگر پولیس کے ذریعے دباؤ ڈالنے کی کوشش کرے گی تو بھی ہم پیچھے ہٹنے والے نہیں ہیں۔‘‘ ان کے مطابق نجف گڑھ ضلع میں ووٹ چوری کے خلاف چلائی جا رہی دستخطی مہم کے دوران پولیس نے انہیں اور کئی کانگریس کارکنوں کو زبردستی حراست میں لیا اور جعفرپور تھانے منتقل کر دیا، جہاں سے بعد میں سبھی کو رہا کر دیا گیا۔

دیویندر یادو نے الزام لگایا کہ یہ کارروائی مرکزی وزیر داخلہ امت شاہ کے اشارے پر کی گئی، جو دراصل کانگریس کی عوامی مہم کو روکنے کی کوشش ہے۔ ان کے مطابق بی جے پی حکومت ووٹ چوری کے الزامات کو چھپانے کے لیے سرکاری مشینری کا غلط استعمال کر رہی ہے۔ انہوں نے کہا، ’’بی جے پی کے لیے یہ کوئی نئی بات نہیں۔ وہ ہمیشہ پولیس، سی بی آئی اور ای ڈی جیسے اداروں کو مخالفین کے خلاف ہتھیار کے طور پر استعمال کرتی رہی ہے۔‘‘

دہلی کے مختلف اضلاع نجف گڑھ، پٹپڑگنج، بدرپور اور چاندنی چوک میں کانگریس نے ووٹ چوری کے خلاف دستخطی مہم چلائی۔ نجف گڑھ میں دیویندر یادو کے ساتھ ضلع صدر سکھبیر شرما، نگران سشما یادو، کمل کانت شرما، راجیش یادو، شانت سوروپ، اوم دت یادو، پرمود جینت سمیت درجنوں عہدیداروں کو پولیس نے حراست میں لیا۔ پٹپڑگنج میں دنیش کمار ایڈووکیٹ، بدرپور میں ہرش چودھری اور چاندنی چوک میں مرزا جاوید علی کی قیادت میں مہم چلائی گئی، جس میں متعدد سابق اراکین اسمبلی اور کانگریس عہدیدار شریک ہوئے۔

دیویندر یادو نے مزید کہا کہ راہل گاندھی نے صرف دو اسمبلیوں میں ووٹ چوری کے ثبوت پیش کیے ہیں مگر ان انکشافات سے بی جے پی کے اقتدار کی بنیاد ہل چکی ہے۔ ان کے مطابق ووٹ چوری دراصل آئین اور جمہوریت پر براہِ راست حملہ ہے اور کانگریس اس کے خلاف ملک گیر سطح پر اپنی آواز بلند کرتی رہے گی۔

انہوں نے کہا، ’’ہم نے آزادی کی جنگ میں قربانیاں دی ہیں، اس لیے کسی بھی جابرانہ حکومت سے گھبرانے والے نہیں۔ اگر بی جے پی سمجھتی ہے کہ پولیس کے ذریعے ہمارے آئینی حق کو دبایا جا سکتا ہے، تو وہ بھول میں ہے۔ ہم سچ کے لیے لڑتے رہیں گے اور ووٹ چوری کے خلاف تحریک کو مزید مضبوط کریں گے۔‘‘