آئی ای ڈی دھماکوں کے باوجود کمزور نہیں پڑا جوانوں کا حوصلہ، کریگوٹا کی پہاڑیوں پر پہلی بار لہرایا قومی پرچم

آج پورے ملک میں یومِ جمہوریہ کا جشن منایا جا رہا ہے۔ یہ جشن جنوبی بستر کے بیجا پور ضلع میں موجود کریگوٹا کی پہاڑیوں پر بھی منایا گیا، جو بہت خاص رہا۔ کریگوٹا کی پہاڑیوں پر جشن کی خاص بات یہ ہے کہ آزادی کے بعد پہلی بار یہاں قومی پرچم لہرایا گیا۔ نکسل متاثرہ اس علاقہ واقع تاڑپالا کیمپ میں سی آر پی ایف کی 196ویں بٹالین اور کوبرا کی 204ویں بٹالین کے جوانوں نے پرچم کشائی کی اور پورے علاقہ میں یومِ جمہوریہ کا جشن دھوم دھام سے منایا گیا۔

غور کرنے والی بات یہ ہے کہ ایک دن قبل ہی کریگوٹا پہاڑی پر آئی ای ڈی دھماکہ ہوا تھا جس میں ڈی آر جی اور کوبرا کے کم و بیش 11 جوان زخمی ہو گئے تھے۔ میڈیا رپورٹس کے مطابق سبھی جوانوں کی حالت مستحکم ہے اور وہ محفوظ بتائے جا رہے ہیں۔ اس حملہ کے باوجود جوانوں کا حوصلہ کمزور نہیں پڑا اور انھوں نے نکسلیوں کے قلعہ کہے جانے والے اس علاقہ میں مکمل شان کے ساتھ ترنگا لہرایا۔

میڈیا رپورٹس میں بتایا جا رہا ہے کہ کچھ ماہ قبل ہی سیکورٹی فورسز نے کریگوٹا کی پہاڑیوں پر قبضہ کیا تھا۔ نکسلی پیچھے ہٹتے وقت علاقہ میں جگہ جگہ آئی ای ڈی لگا گئے تھے۔ انہی آئی ای ڈی کو ڈٹیکٹ کرنے کے دوران اتوار کے روز دھماکہ ہوا، جس میں کئی جوان زخمی ہو گئے تھے۔ اس کے باوجود سیکورٹی فورسز کی موجودگی اور پہاڑی پر ان کا کنٹرول قائم رہا۔