دہلی حکومت کا یو ٹرن! پرانی گاڑیوں پر ایندھن کی پابندی کا فیصلہ واپس

نئی دہلی: دہلی حکومت نے پرانی گاڑیوں پر ایندھن نہ دینے کے فیصلے کو وقتی طور پر واپس لے لیا ہے۔ حکومت نے فضائی معیار کے کمیشن (سی اے کیو ایم) کو خط لکھ کر آگاہ کیا کہ ’تکنیکی مسائل‘ کی وجہ سے اس پابندی کو فی الحال نافذ کرنا ممکن نہیں۔ یہ فیصلہ 15 سال سے زائد پرانی پٹرول گاڑیوں اور 10 سال سے زائد پرانی ڈیزل گاڑیوں پر لاگو کیا جانا تھا۔

وزیر ماحولیات منجندر سرسا نے ایک پریس کانفرنس میں بتایا کہ حکومت پرانی لیکن اچھی حالت میں رکھی گئی نجی گاڑیوں کے مالکان کو سزا دینا نہیں چاہتی۔ البتہ خراب حالت میں موجود یا زیادہ آلودگی پھیلانے والی گاڑیوں کو ضبط کرنے کی کارروائی جاری رہے گی۔

واضح رہے کہ سی اے کیو ایم نے دہلی میں بڑھتی ہوئی آلودگی کے پیش نظر پرانی گاڑیوں پر پابندی کا حکم دیا تھا، جس سے اندازاً 60 لاکھ گاڑیاں متاثر ہوتیں، جن میں دو پہیہ، کاریں، ٹرک اور ونٹیج گاڑیاں شامل ہیں۔

حکومت نے بتایا کہ اے این پی آر کیمرے، جو پرانی گاڑیوں کی شناخت کے لیے نصب کیے گئے تھے، کئی مقامات پر درست کام نہیں کر رہے۔ ان کیمروں میں تکنیکی خرابیاں ہیں، جبکہ لاؤڈ اسپیکر بھی موثر طریقے سے پیغام رسانی نہیں کر پا رہے۔

مزید برآں، دہلی-این سی آر کے مختلف علاقوں سے موصول ہونے والا ڈیٹا ایک دوسرے سے مربوط نہیں ہے، جس سے نگرانی اور آلودگی پر قابو پانے کی کوششیں متاثر ہو رہی ہیں۔ دہلی حکومت نے ان مسائل کے فوری حل کے لیے مرکز سے مدد کی اپیل کی ہے۔

دہلی میں آلودگی پھیلانے والی گاڑیوں پر پابندی عائد کرنے کا حکم جاری کرتے ہوئے ایئر کوالٹی مینجمنٹ کمیشن (سی اے کیو ایم) نے کہا تھا کہ اس بات پر خاص توجہ دی جا رہی ہے کہ سردیوں کے مہینوں میں دہلی دھوئیں کی چادر میں لپٹ جاتی ہے، جبکہ باقی سال بھی یہاں کی فضائی معیار بدستور خراب رہتی ہے۔ ایسے حالات میں پرانی گاڑیوں پر پابندی عائد کرنا ناگزیر ہو جاتا ہے۔