یوتھ کانگریس گرفتاری پر دہلی اور ہماچل پولیس آمنے سامنے

دہلی کے بھارت منڈپم میں منعقدہ اے آئی سمٹ کے دوران یوتھ کانگریس کے احتجاج سے متعلق درج مقدمے میں دہلی پولیس کی کارروائیاں جاری ہیں۔ اسی سلسلے میں بدھ کو یوتھ کانگریس کارکنوں کی گرفتاری کے معاملے پر دہلی پولیس اور ہماچل پردیش پولیس آمنے سامنے آ گئیں۔

اطلاعات کے مطابق دہلی پولیس کے تقریباً 20 اہلکاروں پر مشتمل خصوصی دستے نے شملہ کے علاقے روہڑو سے یوتھ کانگریس کے 3 عہدیداروں کو گرفتار کیا اور انہیں دہلی لے جانے کے لیے روانہ ہو گئی۔ تاہم مقامی پولیس کو اس کارروائی کی پیشگی اطلاع نہیں دی گئی اور نہ ہی ملزمان کو فوری طور پر مقامی عدالت میں پیش کیا گیا۔

جب ہماچل پردیش پولیس کو اس کی اطلاع ملی تو سولن ضلع کے دھرم پور میں ناکہ بندی کر کے دہلی پولیس کی گاڑیوں کو روک لیا گیا۔ صبح تقریباً دس بجے جیسے ہی دہلی پولیس کی ٹیم دھرم پور پہنچی، سولن پولیس نے انہیں آگے بڑھنے سے روک دیا۔ بعد ازاں مقامی پولیس تینوں گرفتار کارکنوں کو دہلی پولیس کے ہمراہ شملہ واپس لے گئی تاکہ قانونی کارروائی مکمل کی جا سکے۔

ذرائع کے مطابق شملہ کی عدالت میں تینوں کارکنوں کو پیش کیا گیا جہاں سماعت کے بعد عدالت نے دہلی پولیس کو ٹرانزٹ ریمانڈ منظور کر لیا۔ کاغذی کارروائی مکمل ہونے کے بعد دہلی پولیس تینوں کارکنوں کو اپنی تحویل میں لے کر دہلی کے لیے روانہ ہو گئی۔

گرفتار کیے گئے افراد کی شناخت سوربھ، سدھارتھ اور ارباز کے طور پر ہوئی ہے۔ بتایا جا رہا ہے کہ اس معاملے میں اب تک کل 11 افراد کو گرفتار کیا جا چکا ہے۔ دہلی پولیس کا کہنا ہے کہ احتجاج کے دوران بعض ضابطوں کی خلاف ورزی کی گئی تھی، جس کی بنیاد پر کارروائی عمل میں لائی جا رہی ہے، جبکہ کانگریس کے حلقوں میں اس اقدام پر سوالات اٹھائے جا رہے ہیں۔