دہلی میں فضائی آلودگی کا قہر جاری، گریپ3 کے قوانین سخت، گھر سے کام کرنے کی اجازت

یہ ایڈوائزری نجی اداروں کو گھر سے کام کرنے کی ہدایت کرتی ہے۔ کمیشن فار ایئر کوالٹی مینجمنٹ (سی اے کیو ایم) کی ہدایات کے مطابق حکومت نے دارالحکومت میں نجی دفاتر کے لیے ایک نئی ایڈوائزری جاری کی ہے جس کے تحت گھر سے کام کرنے کی اجازت دے دی گئی ہے۔

اس کے تحت اب پرائیویٹ دفاتر اپنے 50 فیصد عملے کے ساتھ سائٹ پر کام کریں گے، جبکہ باقی ملازمین گھر سے کام کر سکیں گے۔ یہ قدم آلودگی کی صورتحال کو متوازن کرنے کے لیے احتیاطی اقدام کے طور پر اٹھایا گیا ہے۔

مسلسل بڑھتی ہوئی آلودگی کو دیکھتے ہوئے اتر پردیش حکومت نے بڑا فیصلہ لیا ہے۔ نوئیڈا اور غازی آباد میں ڈیزل آٹو رکشا پر فوری طور پر پابندی لگا دی گئی ہے۔

کمیشن فار ایئر کوالٹی مینجمنٹ نے این سی آر اور آس پاس کے علاقوں میں گریپ3 کے قوانین کو بھی سخت کر دیا ہے۔ واضح رہے کہ کمیشن فار ایئر کوالٹی مینجمنٹ نےگریپ 3 میں تبدیلیاں کی ہیں۔ اس کے تحت صرف تین مراحل ہوں گے۔ گریپ کے چوتھے مرحلے کو پروٹوکول سے ہٹا دیا گیا ہے۔ اس کا مطلب ہے کہ وہ تمام قواعد جوگریپ 4 پر لاگو ہوتے ہیں اب گریپ 3 میں شامل ہو چکے ہیں۔