دہلی: کُٹو کے آٹے کے پکوان کھا کر 200 لوگ بیمار، مریضوں میں پیٹ درد اور قے کی شکایت، معاملے کی جانچ شروع

دہلی کے جہانگیر پوری، سمے پور بادلی، سوروپ نگر اور بھلسوا ڈیئری سمیت آس پاس کے کئی علاقوں میں کُٹو کے آٹے سے بنے پکوان کھا کر 200 لوگ بیمار ہو گئے۔ سبھی مریضوں نے قے اور بے چینی کی شکایت کی ہے جس کے بعد پولیس اور محکمہ خوراک نے فوراً معاملے کی جانچ شروع کر دی۔

23 ستمبر کی صبح 6.10 بجے جہانگیرپوری پولیس تھانے کو اطلاع ملی کہ بڑی تعداد میں لوگ کُٹو کا آٹا کھانے کے بعد بیمار ہو رہے ہیں۔ بی جے آر ایم اسپتال کے ایمرجنسی وارڈ میں طبی افسر ڈاکٹر وششیش یادو نے بتایا کہ جہانگیر پوری، سمے پور، مہندر پارک، بھلسوا ڈیئری، لال باغ اور سوروپ نگر سے تقریباً 200 لوگ قے اور پیٹ درد کی شکایت لے کر آئے۔ سبھی مریضوں کی حالت فی الحال مستحکم ہے۔

پولیس نے محکمہ خوراک کو اطلاع دے کر معاملے کی سنگینی کو دیکھتے ہوئے جانچ کے حکم دے دیئے ہیں۔ ساتھ ہی اسپتال انتظامیہ مریضوں کا علاج کر رہا ہے اور حالات پر نظر رکھی جا رہی ہے۔ ڈاکٹر وشیش یادو نے لوگوں کو اس سلسلے میں چوکس رہنے کی گزارش کی ہے۔

محکمہ خوراک کو کُٹو کے آٹے کی کوالیٹی جانچ کے لیے فوری کارروائی کی ہدایت دی گئی ہے۔ مقامی دکانداروں اور فروخت کنندگان کو بیدار کیا جا رہا ہے تاکہ وہ اپنے مصنوعات کی کوالیٹی بنائے رکھیں اور ملاوٹ سے بچیں۔ فوڈ سیکوریٹی افسر کٹو کے آٹے کی سیمپلنگ کر اس کی جانچ کر رہے ہیں۔

ماہرین نے بتایا کہ کٹو کے آٹے میں ملاوٹ یا اس کا خراب ہونا اس کے زہریلا ہونے کی وجہ بن سکتا ہے۔ آٹے میں چھپکلی یا سانپ کے پس جانے یا کھلے میں رکھنے سے آٹا زہریلا ہو سکتا ہے۔ اس کے علاوہ لمبے وقت تک خراب طریقے سے اسٹور کیا گیا آٹا بھی صحت کے لیے خطرناک ثابت ہو سکتا ہے۔