بی جےپی حکومت میں بدعنوانی شباب پر: اکھلیش

سماج وادی پارٹی(ایس پی) سربراہ و سابق وزیر اعلی اکھلیش یادو نے کہا ہےکہ بی جےپی حکومت میں بدعنوانی، بے ایمانی اور لوٹ شباب پر ہے۔ ہر محکمے میں بدعنوانی اور لوٹ جاری ہے۔ کسانوں کی فصلوں کی خرید میں بدعنوانی چل رہی ہے۔ دھان خرید میں بدعنوانی کا کاغذات میں ریکارڈ ہے۔ اسمبلی سے لے کر کئی پلیٹ فارم پر شکایت ہوئی لیکن لوٹ کرنےو الوں کے خلاف کاروائی نہیں ہورہی ہے۔

یادو نے کہا کہ دھان کی خریداری کے ساتھ ساتھ بندیل کھنڈ میں مونگ پھلی کی خریداری میں بڑے پیمانے پر دھاندلی ہوئی ہے۔ کسانوں کو مونگ پھلی کی قیمت نہیں ملی۔ بی جے پی کارکنوں اور دلالوں نے فائدہ اٹھایا۔ دھان اور مونگ پھلی کے بعد اب گندم کی خریداری میں بڑے پیمانے پر دھاندلی ہو رہی ہے، گندم کی خریداری میں بی جے پی حکومت اور صنعت کاروں کی ملی بھگت ہے۔ گندم کی سرکاری خریداری نہیں ہورہی ہے۔

کسانوں کی گندم مڈل مین کے ذریعہ صنعت کاروں کے لیے خریدی جا رہی ہے۔ حکومت نے پابندی لگا دی ہے۔ مڈل مین کسانوں سے زیادہ قیمت پر گندم نہ خریدیں۔ اگر حکومت خود اس ملی بھگت میں ملوث ہے تو کسانوں کو گندم کی قیمت کیسے ملے گی۔ حکومت کسانوں کو گندم کی صحیح قیمت نہیں دینا چاہتی۔
انہوں نے کہا کہ اس حکومت نے کھاد، بیج، کیڑے مار ادویات، بجلی اور ڈیزل جیسی تمام چیزوں کی قیمتیں بڑھا کر کسانوں کے لیے بحران پیدا کر دیا ہے۔ بی جے پی حکومت کسانوں کی توہین کر رہی ہے۔ سوال پوچھنے پر ایف آئی آر درج کرائی جاتی ہے۔ جب احتجاج ہوتا ہے تو پگڑی اچھال دی جاتی ہے۔ غازی پور سے لے کر غازی آباد تک بی جے پی نے کسانوں کو ایک بار نہیں بلکہ کئی مواقع پر ذلیل کیا ہے۔

یادو نے کہا کہ اس حکومت میں ہر شعبہ میں ہر سطح پر بدعنوانی ہو رہی ہے۔ کرپٹ لوگوں نے لوٹ مار کے لیے ایک مہینہ مقرر کر رکھا ہے۔ لکھنؤ میں آگ لگنے سے دو لوگوں کی موت ہو گئی۔ صنعتوں کو فائر این او سی دینے میں کرپشن ہوتی ہے۔ سرمایہ کاری کے نام پر کرپشن ہورہی ہے۔ اتر پردیش کے افسران بدعنوانی اور لوٹ مار کے ذریعہ کمائی گئی رقم کو دوسری ریاستوں میں لگا رہے ہیں۔ریاست میں مختلف منافع بخش عہدوں پر فائز دیگر ریاستوں کے اہلکار بھی دوسری ریاستوں میں سرمایہ کاری کر رہے ہیں۔ ریاست میں کمیشن اور تقسیم کے تنازع کی وجہ سے ایک آئی اے ایس مفرور ہے۔