یوپی میں کورونا کا پھیلاؤ، راجدھانی لکھنؤ میں اس سال کی پہلی موت

لکھنؤ: کورونا کی وبا کے ملک بھر میں تازہ پھیلاؤ کے درمیان اتر پردیش میں بھی نئے معاملوں میں اضافہ ہو رہا ہے۔ دریں اثنا، ریاست کی راجدھانی لکھنؤ میں کورونا کے سبب رواں سال کی پہلی موت درج کی گئی۔

فوت ہونے والی خاتون لکھنؤ کی ورنداون کالونی کی رہائشی تھی اور اسے عالم باغ کے ایک نجی اسپتال میں داخل کرایا گیا تھا۔ یہ اطلاع ایک عہدیدار نے دی۔ خیال رہے کہ اتر پردیش میں ایک ہی دن میں کورونا کے 192 تازہ معاملے درج کئے گئے ہیں۔ وہیں، لکھنؤ میں کورونا کے 35 نئے معاملہ دج کئے گئے۔

کے جی ایم یو نے بتایا کہ بزرگ خاتون کی ایک سے زیادہ اعضا ناکام ہونے کے سبب موت ہوئی۔ مریض کی حالت کافی نازک تھی اور اسپتال لاتے ہی اسے وینٹی لیٹر کی رپورٹ پر رکھا گیا۔ ڈاکٹروں نے اس کی جان بچانے کی بھرپور کوشش کی لیکن وہ جانبر نہ ہو سکی۔

خیال رہے کہ یوپی میں کوونا کے فعال کیسز کی تعداد 742 سے تجاوز کر گئی ہے۔ 7 دنوں کے اندر ریاست بھر سے کورونا کا 1000 کیسز درج کیے جا چکے ہیں۔ جمعرات کو آئی رپورٹ میں گزشتہ 24 گھنٹوں میں سب سے زیادہ معاملے گوتم بدھ نگر اور لکھنؤ میں درج کیے گئے ہیں۔