نیٹ یو جی 2026 امتحان منسوخ، جے رام رمیش نے این ٹی اے اور مودی حکومت پر اٹھائے سنگین سوال

نئی دہلی: نیٹ یو جی 2026 امتحان کے پیپر لیک معاملے نے ملک بھر میں بڑا سیاسی اور تعلیمی بحران کھڑا کر دیا ہے۔ امتحان منسوخ کیے جانے کے بعد کانگریس کے سینئر لیڈر جے رام رمیش نے مودی حکومت اور نیشنل ٹیسٹنگ ایجنسی یعنی این ٹی اے کو شدید تنقید کا نشانہ بنایا ہے۔ انہوں نے اپنی ایکس پوسٹ میں کہا کہ نیٹ یو جی پیپر لیک اور اس کے بعد امتحان کی منسوخی این ٹی اے کی کارکردگی پر سنگین سوالات کھڑے کرتی ہے۔ قب ازیں راہل گاندھی نے بھی اس معاملہ پر حکومت کو آڑے ہاتھوں لیتے ہوئے اسے طلبہ کے ساتھ جرم سے تشبیہ دی تھی۔

جے رام رمیش نے کہا کہ پارلیمانی قائمہ کمیٹی کی 371 ویں رپورٹ میں بھی اس بات کا ذکر کیا گیا تھا کہ صرف 2024 میں این ٹی اے کی جانب سے منعقد 14 قومی امتحانات میں سے پانچ میں پیپر لیک یا بے ضابطگیوں کے معاملات سامنے آئے تھے۔ انہوں نے یہ بھی کہا کہ جے ای ای مینز 2025 میں ’انسر کی‘ کی غلطیوں کے سبب 12 سوال واپس لینے پڑے تھے، جبکہ سی یو ای ٹی امتحانات میں بھی نتائج اور انعقاد میں تاخیر نے تعلیمی نظام کو متاثر کیا۔

انہوں نے الزام لگایا کہ مودی حکومت نے پرانے داخلہ نظام کو ختم کر کے ایک مرکزی نظام نافذ کیا، جو بدعنوانی اور بے ضابطگیوں سے پر ہے۔ ان کے مطابق این ٹی اے مسلسل پارلیمنٹ کو اپنی سالانہ رپورٹ دینے میں ناکام رہی ہے اور صرف مالیاتی تفصیلات پیش کرتی رہی ہے۔ جے رام رمیش نے کہا کہ 16 جون 2024 کو وزیر تعلیم نے خود اعتراف کیا تھا کہ این ٹی اے کو بڑے پیمانے پر اصلاحات کی ضرورت ہے، مگر دو برس گزرنے کے باوجود صورت حال میں کوئی نمایاں تبدیلی نظر نہیں آ رہی۔

ادھر تحقیقات میں یہ بات سامنے آئی ہے کہ نیٹ یو جی 2026 امتحان سے پہلے ایک ’گیس پیپر‘ واٹس ایپ سمیت سوشل میڈیا پلیٹ فارمز پر گردش کر رہا تھا۔ بتایا جا رہا ہے کہ اس دستاویز میں شامل کئی سوالات اصل امتحان سے مماثلت رکھتے تھے۔ ذرائع کے مطابق تقریباً 400 سوالات پر مشتمل ایک فائل امتحان سے پہلے ہی طلبہ کے درمیان پہنچ چکی تھی، جس کے بعد پیپر لیک کے شبہات مزید مضبوط ہو گئے۔

راجستھان اسپیشل آپریشنز گروپ یعنی ایس او جی نے معاملے کی تحقیقات تیز کرتے ہوئے مختلف ریاستوں میں چھاپے مارے ہیں۔ دہرادون اس معاملے میں اہم مقام کے طور پر سامنے آیا، جہاں سے پہلے بھی کئی مشتبہ افراد کو حراست میں لیا جا چکا ہے۔ تازہ کارروائی میں فرار ملزم راکیش کی گرفتاری کو اہم کامیابی مانا جا رہا ہے۔ ذرائع کے مطابق اب تک 20 سے زیادہ مشتبہ افراد کو حراست میں لیا جا چکا ہے جبکہ کئی دیگر ملزمان، جن میں ماسٹر مائنڈ بھی شامل ہیں، گرفتار کیے جا چکے ہیں۔

تحقیقات سے اشارہ ملا ہے کہ یہ معاملہ کسی ایک فرد تک محدود نہیں بلکہ ایک منظم گروہ کے ذریعے انجام دیا گیا ہو سکتا ہے۔ اس دوران دہرادون پولیس نے کیمرے پر بیان دینے سے انکار کیا، تاہم اتنا ضرور کہا کہ راجستھان پولیس نے ان سے رابطہ کیا تھا اور ایک ملزم کو اپنے ساتھ لے گئی۔ مرکزی ایجنسیوں کی جانب سے بھی اس معاملے کی جانچ کے امکانات ظاہر کیے جا رہے ہیں۔