ہلدوانی شدھی کرن تنازعہ: کانگریس ارکانِ پارلیمنٹ کا تھانے پہنچ کر ’زیرو ایف آئی آر‘ کا مطالبہ، پولیس کا انکار

نئی دہلی: کانگریس صدر ملکارجن کھڑگے کی اتراکھنڈ کے ہلدوانی میں منعقدہ ریلی کے مقام کا ’شدھی کرن‘ کیے جانے کے خلاف کانگریس کے تقریباً 20 ایس سی/ایس ٹی ارکان پارلیمنٹ اور دیگر رہنما منگل کو نئی دہلی کے پارلیمنٹ اسٹریٹ تھانے پہنچے اور ’زیرو ایف آئی آر‘ درج کرنے کا مطالبہ کیا۔ تاہم، کانگریس رہنماؤں کے مطابق پولیس نے ایف آئی آر درج کرنے سے انکار کر دیا۔

کانگریس رکن پارلیمنٹ ملو روی نے پارلیمنٹ اسٹریٹ پولیس اسٹیشن میں تحریری شکایت دے کر ’شری رام دھرمارتھ سیوا نیاس‘ کے صدر گریش چندر پانڈے اور 15 دیگر افراد کے خلاف مقدمہ درج کرنے کا مطالبہ کیا۔

شکایت میں الزام لگایا گیا ہے کہ پانڈے اور 15 نامعلوم افراد نے مجرمانہ سازش کے تحت 8 اگست کو ہلدوانی کے رام لیلا میدان میں کھڑگے کی ریلی کے دو روز بعد، 10 اگست کو وہاں یگیہ کیا اور گنگاجل کا چھڑکاؤ کیا۔ کانگریس کا الزام ہے کہ کھڑگے کی ریلی کے بعد مقام کا یہ ’شدھی کرن‘ دراصل درج فہرست ذاتوں اور درج فہرست قبائل سے تعلق رکھنے والے افراد کی توہین اور انہیں کمتر دکھانے کی کوشش تھی۔ پارٹی نے اسے آئین میں مساوات اور چھوت چھات کے خاتمے کی ضمانت کے منافی قرار دیا ہے۔

کانگریس کے سینئر رہنما کے راجو نے سوشل میڈیا پلیٹ فارم ’ایکس‘ پر کہا کہ تقریباً 20 ایس سی/ایس ٹی ارکان پارلیمنٹ کے ساتھ وہ پارلیمنٹ اسٹریٹ تھانے پہنچے تھے اور 10 اگست کو ہلدوانی میں پیش آئے واقعے پر درج فہرست ذات و قبائل (انسداد مظالم) ایکٹ، 1989 کے تحت زیرو ایف آئی آر درج کرنے کی درخواست کی۔

راجو کے مطابق ارکان پارلیمنٹ نے تقریباً دو گھنٹے تک پولیس سے ایف آئی آر درج کرنے کی درخواست کی، لیکن اسٹیشن ہاؤس آفیسر (ایس ایچ او) نے زیرو ایف آئی آر درج کرنے سے انکار کر دیا۔ ان کا یہ بھی الزام ہے کہ ایس ایچ او نے ایف آئی آر درج نہ کرنے کی وجہ تحریری طور پر دینے سے بھی انکار کیا۔

راجو نے کہا کہ اگر ایس سی/ایس ٹی برادری سے تعلق رکھنے والے ارکان پارلیمنٹ کو ایف آئی آر درج کرانے کے لیے ایسی صورت حال کا سامنا کرنا پڑ رہا ہے تو اندازہ لگایا جا سکتا ہے کہ عام ایس سی/ایس ٹی شہریوں کو مظالم کی صورت میں کن حالات سے گزرنا پڑتا ہوگا۔

ملو روی نے پولیس سے معاملے میں مقدمہ درج کرکے ملزمان کی گرفتاری اور ایس سی/ایس ٹی (انسداد مظالم) ایکٹ، قومی وقار کی توہین کی روک تھام سے متعلق قانون اور بھارتیہ نیائے سنہتا (بی این ایس) کی متعلقہ دفعات کے تحت سخت قانونی کارروائی کا مطالبہ کیا ہے۔ دریں اثنا، ہلدوانی کے رام لیلا میدان میں کھڑگے کی ریلی کے بعد ’شدھی کرن‘ کے خلاف اور کانگریس رہنما راہل گاندھی کے خلاف درج ایف آئی آر واپس لینے کے مطالبے پر لکھنؤ کے ایکو گارڈن میں جاری غیر معینہ مدت کا دھرنا منگل کو آٹھویں روز بھی جاری رہا۔

اتر پردیش کانگریس کے مطابق دھرنے میں پارٹی کے متعدد سینئر عہدیداروں اور کارکنوں نے شرکت کی۔ پارٹی نے کہا کہ ’سچ، انصاف اور آئین‘ کے تحفظ کے لیے جاری یہ احتجاج مطالبات کی تکمیل تک جاری رہے گا۔