اترپردیش میں سردی کی دستک، دن کے وقت دھوپ اور رات میں ہونے لگا ٹھٹھرن کا احساس

گرمی کی شدت اورمانسون رخصت ہوتے ہی اتر پردیش میں اب سردی نے دستک دے دی ہے۔ دن کے وقت سورج چمک رہا ہے، لیکن ناقابل برداشت گرمی نہیں لگ رہی ہے۔ صبح اور شام کے اوقات میں ہلکی سردی محسوس کی جانے لگی ہے۔ گزشتہ چند دنوں میں کم سے کم درجہ حرارت میں کمی آئی ہے۔ اس طرح محکمہ موسمیات نے اگلے پانچ دنوں تک اسی طرح کے موسم کی پیش گوئی کی ہے۔

آج 13 اکتوبر کو بھی اتر پردیش کے دونوں ڈویژنوں میں خشک موسم کی پیش گوئی کی گئی ہے۔ زیادہ تر علاقوں میں آسمان بلکل صاف رہے گا اور لوگ دھوپ کا تجربہ کریں گے۔ کہیں بھی بارش کی کوئی پیش گوئی نہیں ہے اور نہ ہی کوئی خاص وارننگ جاری کی گئی ہے۔ مانسون اب مکمل طور پر پیچھے ہٹ چکا ہے۔ صبح اور رات میں ہلکی سردی بڑھ گئی ہے۔

آنے والے دنوں میں موسم جوں کہ توں رہے گا۔ اس طرح ریاست میں 18 اکتوبر تک موسم خشک رہنے کا امکان ہے۔ اگلے پانچ دنوں کے دوران زیادہ سے زیادہ اور کم سے کم درجہ حرارت میں کوئی بڑی تبدیلی نہیں آئے گی۔ رات کے وقت سردی بڑھنے سے اب لوگوں کو ہلکی ٹھٹھرن بھی محسوس ہونے گلی ہے جس سے اندازہ لگایا جارہا ہے کہ جلد ہی کمبل اور لحاف نکالنے کے دن آنے والے ہیں۔

محکمہ موسمیات کے مطابق ریاست میں خشک مغربی اور شمال مغربی ہوائیں چل رہی ہیں جس کے باعث موسم آہستہ آہستہ ٹھنڈا ہو رہا ہے اور لوگ صبح و شام سردی کا احساس کر رہے ہیں۔ ریاست میں زیادہ سے زیادہ درجہ حرارت 35 ڈگری سیلسیس اور 29 ڈگری سیلسیس کے درمیان ہے۔ اتوار کو کانپور، بہرائچ، پریاگ راج اور گورکھپور سب سے زیادہ گرم اضلاع تھے۔

اتر پردیش میں کم سے کم درجہ حرارت کے حوالے سے کانپور، بارہ بنکی، اٹاوہ، بہرائچ اور بریلی میں سب سے ٹھنڈی راتیں رہیں۔ پچھلے 24 گھنٹوں میں کانپور میں کم سے کم درجہ حرارت 14.8 ڈگری سیلسیس، بارہ بنکی میں 16 ڈگری سیلسیس، بہرائچ میں 17.4 ڈگری سیلسیس، اٹاوہ میں 16.2 ڈگری سیلسیس اور بریلی میں 17.5 ڈگری سیلسیس ریکارڈ کیا گیا۔ ریاست کی راجدھانی لکھنؤ میں کم سے کم درجہ حرارت 18.2 ڈگری سیلسیس اور میرٹھ میں 18.9 ڈگری سیلسیس ریکارڈ کیا گیا۔