'سری رام سینا کے رہنما نے مسلم ہیڈ ماسٹر کا تبادلہ کروانے کے لیے پینے کے پانی میں زہر ملایا': سدارامیا

کرناٹک کے وزیر اعلیٰ سدارامیا نے بیلگاوی ضلع کے ہلی کٹی گاؤں کے ایک سرکاری اسکول میں پینے کے پانی میں زہر ملانے کے مبینہ واقعہ کی سخت مذمت کی۔ بتایا جاتا ہے کہ یہ حرکت مبینہ طور پر مسلم ہیڈ ماسٹر کے تبادلے کے لیے دباؤ ڈالنے کے لیے کی گئی تھی۔ سدارامیا نے ایکس پر ایک پوسٹ میں اسے مذہبی منافرت اور جنون سے متاثر ایک 'گھناؤنی حرکت' قرار دیا۔

سدارامیا نے ایک بیان میں کہا، 'بیلاگاوی ضلع کے ساوادتی تعلقہ کے ہلی کٹی گاؤں کے سرکاری اسکول کے ہیڈ ماسٹر کا تعلق مسلم کمیونٹی سے ہے۔ اسے کہیں اور منتقل کرنے کے مذموم ارادے سے سری رام سینا کے تعلقہ صدر ساگر پاٹل اور دو دیگر کو اسکولی بچوں کے پینے کے پانی میں زہر ملانے کے الزام میں گرفتار کیا گیا ہے۔' یہ واقعہ تقریباً 15 روز قبل پیش آیا تھا جس میں کئی بچے بیمار ہوگئے تھے تاہم کوئی جانی نقصان نہیں ہوا۔

اس عمل کو فرقہ وارانہ ہم آہنگی کے لیے ایک 'سنگین خطرہ' قرار دیتے ہوئے سدارامیا نے کہا، "مذہبی جنون اور فرقہ وارانہ نفرت  جیسی گھناؤنی حرکتوں کو جنم دے سکتی ہے اور یہ واقعہ اس کا ثبوت ہے، جس کے نتیجے میں معصوم بچوں کی موت ہو سکتی تھی۔ اتنا ظلم اور نفرت کیسے پیدا ہو سکتا ہے ۔‘

بھارتیہ جنتا پارٹی  کے رہنماؤں اور دائیں بازو کی تنظیموں پر تنقید کرتے ہوئے، انہوں نے کہا کہ سیاسی فائدے کے لیے مذہب کے نام پر نفرت پھیلانے والوں کو خود کا جائزہ لینا چاہیے۔"سدا رامیا نے پوچھا ’کیا پرمود متالک (سری رام سینا کے سربراہ) اس واقعہ کی ذمہ داری لیں گے؟ کیا بی وائی وجےندر ذمہ داری لیں گے؟ کیا آر اشوک ذمہ داری لیں گے؟ ایسے لیڈر جو ہمیشہ سماجی طور پر تباہ کن کارروائیوں کی حمایت کرتے ہیں، انہیں اب آگے آنا چاہئے اور اپنے گناہوں کا کفارہ دینا چاہئے،۔‘

وزیر اعلیٰ نے متنبہ کیا کہ ہر قسم کی تعصب معاشرے کے لیے خطرہ ہے۔ انہوں نے کہا کہ "تعصب اور بنیاد پرستی کی تمام شکلیں انسانی معاشرے کے لیے خطرناک ہیں۔ ہم نے نفرت انگیز تقاریر اور فرقہ وارانہ فسادات کو روکنے کے لیے ایک خصوصی ٹاسک فورس قائم کیا ہے اور ہم ایسے عناصر کے خلاف ہر ممکن قانونی کارروائی کر رہے ہیں۔"

عوامی تعاون کی اپیل کرتے ہوئے انہوں نے کہا کہ "ہماری تمام کوششوں کو نتیجہ خیز بنانے کے لیے عوام کو بھی ایسی طاقتوں کے خلاف آواز اٹھانی چاہیے، ان کی مخالفت کرنی چاہیے اور شکایات درج کرنی چاہیے۔ میں اب بھی مانتا ہوں کہ جو لوگ آپس میں مل جل کر رہنا چاہتے ہیں، ان کی تعداد فرقہ پرستوں سے سو گنا زیادہ ہے۔"