حکومتوں کی بلڈوزر پالیسی کے خلاف چیف جسٹس آف انڈیا بی آر گوئی نے رکھی اپنی بے باک رائے

چیف جسٹس آف انڈیا بی آر گوئی نے حکومتوں کی بلڈوزر پالیسی کے خلاف گزشتہ دنوں ایک تقریب کے دوران بے باک رائے رکھی ہے۔ انھوں نے گوا کی راجدھانی پنجی میں 23 اگست کو گوا ہائی کورٹ بار ایسو سی ایشن کی طرف سے منعقد تقریب میں شرکت کی، جہاں کی گئی اپنی تقریر میں بلڈوزر کارروائی سے متعلق کچھ اہم باتیں کہیں۔ انھوں نے تقریب میں موجود لوگوں سے خطاب کرتے ہوئے کہا کہ ’’مجھے خوشی ہے، قانونی طریقۂ کار پر عمل کیے بغیر ملزم اشخاص کے گھروں کو منہدم کرنے کے خلاف سپریم کورٹ کے فیصلے نے شہریوں کے حقوق کو برقرار رکھا ہے۔‘‘

قابل ذکر ہے کہ بی آر گوئی سپریم کورٹ کی اس بنچ کا حصہ تھے، جس نے گزشتہ سال ’فوری بلڈوزر کارروائی‘ کی مذمت کی تھی اور جائیدادوں کے انہدام پر ملک بھر کے لیے گائیڈلائن مقرر کی تھی۔ بنچ نے اپنے فیصلے میں کہا تھا کہ ایگزیکٹیو جج نہیں بن سکتا اور کسی ملزم کو قصوروار قرار نہیں دے سکتا، اور نہ ہی اس کا گھر منہدم کر سکتا ہے۔

بہرحال، گوا ہائی کورٹ بار ایسو سی ایشن کی تقریب سے خطاب کرتے ہوئے چیف جسٹس آف انڈیا نے ریزرو طبقہ میں ’کریمی لیئر‘ پر اپنے تاریخی فیصلے کے پیچھے موجود کچھ دلیلوں کو بھی سمجھایا۔ انھوں نے کہا کہ ’’میرے فیصلے کی تنقید میری ہی کمیونٹی کے لوگوں نے کی، لیکن میں ہمیشہ مانتا ہوں کہ مجھے اپنا فیصلہ عوام کی خواہشات یا دباؤ کے حساب سے نہیں، بلکہ قانون کی سمجھ اور اپنے ضمیر کی آواز کی بنیاد پر لکھنا چاہیے۔‘‘