برہمن چہرہ اور بی ایس پی حکومت میں وزیر رہ چکے نکول دوبے کانگریس میں شامل

دہلی / لکھنؤ: بی ایس پی حکومت میں کابینہ کے وزیر رہ چکے نکول دوبے نے جمعرات کے روز کانگریس میں شمولیت اختیار کر لی۔ نکول دوبے کو یوپی کی سیاست میں برہمن چہرے کے طور پر جانا جاتا ہے، جس کی مدد سے بی ایس پی سپریمو مایاوتی 2007 میں برہمن-دلت اتحاد کے دم پر اقتدار میں قابض ہوئی تھیں۔ نکول دوبے پیشے سے وکیل ہیں اور اتر پردیش کے روشن خیال لوگوں میں گہرا دخل رکھتے ہیں۔

پارٹی ذرائع کے مطابق نکول دوبے نے کچھ دن پہلے دہلی میں کانگریس جنرل سکریٹری پرینکا گاندھی سے ملاقات کی تھی، جس کے بعد انہوں نے کانگریس میں شمولیت اختیار کر لی۔ اتر پردیش میں برہمنوں کے نمایاں چہرے کے طور پر جانے جانے والے نکول دوبے نے بھائی چارہ کمیٹیاں تشکیل دے کر مایاوتی کو اقتدار میں لانے میں اہم کردار ادا کیا تھا۔

پارٹی ذرائع کا کہنا ہے کہ نکول دوبے کے بعد جلد ہی یوپی کی سیاست کے کئی اہم نام کانگریس میں شامل ہونے جا رہے ہیں، جن میں ایس پی اور بی ایس پی کے کئی بڑے لیڈر شامل ہیں۔ سیاسی گلیاروں میں یہ بحث بھی ہو رہی ہے کہ کہ آنے والے لوک سبھا انتخابات میں بی جے پی کانگریس سے سیدھی ٹکر میں ہے، اس لیے کئی قدآور اب کانگریس کا ہاتھ تھامنے کے لئے تیار ہیں۔