دوسری ریاستوں میں ہجرت کو روکنے کے لیے بلیو پرنٹ تیار ہے: میسا بھارتی

وزیر اعظم نریندر مودی کے ’کٹا‘ والے بیان پر آر جے ڈی کی رکن پارلیمنٹ میسا بھارتی نے جوابی حملہ کیا ہے۔ انہوں نے طنز کستے ہوئے کہا کہ وہ ہمارے بھی وزیر اعظم ہیں، اس ملک کے بھی وزیر اعظم ہیں۔ ان کے منہ سے اس طرح کا بیان مناسب نہیں ہے۔ انہیں بہار میں فیکٹری لگانے اور ہجرت کو روکنے کے متعلق بات کرنی چاہیے تھی، لیکن وہ تو بھوجپوری گانا سن رہے ہیں۔ ساتھ ہی انہوں نے سوال اٹھایا کہ سمستی پور کے پاس وی وی پیٹ کی پرچیاں پھینکی ہوئی ملیں۔ اگر آر او کو معطل کیا گیا ہے کہ تو کہیں نہ کہیں یہ دال پوری طرح کالی ہے۔ انہوں نے الیکشن کمیشن کی غیر جانبداری پر بھی سوال اٹھایا ہے۔

آر جے ڈی لیڈر کا کہنا ہے کہ ’’وزیر اعظم بے روزگاروں کے بارے میں ایک لفظ تو بولتے۔ لیکن وہ تو آجکل بھوجپوری گانا سن رہے ہیں۔ گانے تو بہت طرح کے آتے ہیں، خواہ وہ حکمراں جماعت کے ہوں یا اپوزیشن کے ہوں۔ یہ مسئلہ نہیں ہے، اصل مسئلہ بہار ہے کہ کیسے ریاست کی ترقی ہو، بے روزگاروں کو کیسے روزگار ملے اور لوگوں کو مہنگائی سے کیسے نجات ملے۔‘‘ ساتھ ہی انہوں نے کہا کہ بہار کو درپیش مسائل اور ان کے حل کے لیے صرف تیجسوی یادو اور مہاگٹھ بندھن کے لیڈران ہی لوگوں کے پاس جا رہے ہیں۔

میسا بھارتی نے مزید کہا کہ آخری مرحلہ کی پولنگ کے لیے انتخابی مہم آج ختم ہو جائے گی۔ حکمراں جماعت کے پاس کوئی مدعا نہیں ہے۔ جبکہ اپوزیشن بہار کے مسائل کو لے کر عوام کے درمیان جا رہی ہے۔ مہاگٹھ بندھن کو عوام کی مکمل حمایت مل رہی ہے۔ نوجوان طبقہ تیجسوی یادو کی جانب امید کی نگاہوں سے دیکھ رہے ہیں کہ وہ ماضی کی طرح اپنے وعدوں کو پورا کریں گے۔ خواہ وہ مائی بہن یوجنا ہو یا ہر گھر میں سرکاری ملازمت دینے کی بات ہو۔ دوسری ریاستوں میں ہجرت کو روکنے کے لیے بلیو پرنٹ تیار ہے کہ کیسے بہار میں ہم لوگ فیکٹری لگائیں گے۔

اسٹرانگ روم میں سی سی ٹی وی بند ہونے کی مبینہ وائرل ویڈیو پر آر جے ڈی لیڈر میسا بھارتی نے کہا کہ ’’صرف نالندہ میں ہی نہیں، میں نے داناپور میں بھی اس کے بارے میں سنا ہے۔ بہت جگہ اس کے بارے میں میں نے سنا ہے تو آخر اس کی وجہ کیا ہے۔‘‘ ساتھ ہی انہوں نے کہا کہ سمستی پور کے پاس وی وی پیٹ کی پرچیاں پھینکی ہوئی ملیں۔ آر او کو معطل کیا گیا ہے تو کہیں نہ کہیں یہ دال پوری کی پوری کالی ہے۔ اس کا مطلب الیکشن کمیشن غیر جانبدار نہیں ہے اور اقتدار میں بیٹھے لوگوں کے دباؤ میں کام کر رہا ہے۔

تیجسوی یادو کی سالگرہ پر میسا بھارتی نے کہا کہ ’’تیجسوی یادو کو سالگرہ کی بہت بہت مبارکباد، وہ اپنی زندگی میں ترقی کریں، خوشحال رہیں۔ مجھے تیسجوی سے امید ہے کہ وہ عوام کی امیدوں پر پورا اتریں گے اور موقع ملنے پر آج بہار کے عوام سے کیے گئے اپنے وعدوں کو پورا کریں گے۔‘‘