عام آدمی پارٹی  پراپرٹی ٹیکس کے نام پر لوگوں کو دھوکہ دینے کی کوشش کر رہی ہے: بی جے پی

بھارتیہ جنتا پارٹی (بی جے پی) کی دہلی ریاستی یونٹ نے پراپرٹی ٹیکس (ہاؤس ٹیکس) کے معاملے پر عام آدمی پارٹی (عآپ) کو نشانہ بناتے ہوئے کہا ہے کہ شکست سے مایوس عام آدمی پارٹی کے رہنما ایک بار پھر دہلی کے لوگوں کو دھوکہ دینے کی کوشش کر رہے ہیں۔

دہلی میونسپل کارپوریشن (ایم سی ڈی) میں حزب اختلاف کے رہنما راجہ اقبال سنگھ اور دہلی بی جے پی کے ترجمان پراوین شنکر کپور نے پیر کو کہا کہ اسمبلی انتخابات میں شکست کے بعد، عآپ اب ایم سی ڈی میں اکثریت کھو چکی ہے کیونکہ اس کے کونسلرز بی جے پی میں چلے گئے ہیں۔

بی جے پی رہنماؤں نے کہا کہ عآپ رہنما اچھی طرح جانتے ہیں کہ پراپرٹی ٹیکس سے متعلق کل ان کے اعلانات چھلاوا ہیں، کیونکہ ایسا کوئی بھی اعلان کرنے سے پہلے دہلی مالیاتی کمیشن، سٹی ویلیویشن کمیٹی اور کارپوریشن کی اسٹینڈنگ کمیٹی کی پیشگی منظوری ضروری ہے، جو آج تک تشکیل نہیں دی گئی ہے۔

سنگھ نے کہا کہ عآپ ایم پی سنجے سنگھ اور آپ رہنما درگیش پاٹھک ہمیشہ جھوٹ کی سیاست کرتے رہے ہیں، لیکن دہلی کے میئر مہیش کھنچی اور لیڈر آف ہاؤس مکیش گوئل میونسپل کارپوریشن کے قوانین سے واقف ہیں۔ اس کے باوجود اب وہ جان بوجھ کر میونسپل کارپوریشن ہاؤس میں افراتفری کی صورتحال پیدا کر رہے ہیں۔

راجہ اقبال سنگھ اور پروین شنکر کپور نے کہا ہے کہ دہلی کے لوگ چاہتے ہیں کہ جھوٹے اعلانات کرنے کے بجائے عآپ کی قیادت آج  25 فروری کو دہلی میونسپل کارپوریشن ہاؤس میں اپنی اکثریت ثابت کرے۔