بہار: مچھلی پکانے میں ناکام ہوئی بہو، تو سسرال والوں نے کر دیا قتل!

بہار کے ضلع سپول میں ایک حیران کرنے والا معاملہ سامنے آیا ہے۔ یہاں پر سسرال والوں نے بہو کو صرف اس لیے موت کے گھاٹ اتار دیا کیونکہ وہ مچھلی نہیں بنا پائی۔ بہو کا قتل کرنے کے بعد سسرال والوں نے اس کی لاش بورے میں بند کر کے ندی کے پاس پھینک دی۔ جب مائیکہ والوں کو کچھ شبہ ہوا تو پولس سے شکایت کی۔ شکایت درج کیے جانے کے بعد پولس نے خاتون کی تلاش شروع کی اور ندی کے پاس سے لاش برآمد ہوئی۔ خاتون کی شناخت کے بعد پولس نے ملزم شوہر سمیت دیگر سسرال والوں کے خلاف ایف آئی آر درج کی۔

سپول کے رتن پورہ تھانہ علاقہ واقع کوسی مشرقی پشتہ ڈھانڈا گاؤں کے پاس بند بورے میں خاتون کی لاش ملنے کے بعد اس معاملے میں پولس نے خاتون کے شوہر سے پوچھ تاچھ کی جس سے سچائی سامنے آ گئی۔ خاتون کی شناخت سنیلا دیوی کے طور پر ہوئی ہے۔ خاتون کے اہل خانہ نے گمشدگی کی رپورٹ تھانہ میں درج کرائی تھی، جب اس کی لاش برآمد ہو گئی تو گھر والوں کا رو رو کر برا حال ہے۔ مقتولہ کے والد نے پولس کو بتایا کہ مارچ 2020 میں بیٹی کی شادی ساتن پٹی پنچایت کے ڈھانڈا باشندہ املیش پاسوان کے بیٹے شیویش پاسوان کے ساتھ ہوئی تھی۔

مقتولہ کے والد کا کہنا ہے کہ جب دیوالی کے بعد وہ بیٹی سے ملنے پہنچے تو سسرال میں اسے نہیں دیکھ کر حیران ہوئے۔ سسرال والوں سے جب اس سلسلے میں پوچھا تو وہ لوگ ٹال مٹول کرنے والا جواب دے رہے تھے۔ اس کے بعد مائیکہ والوں نے تھانہ رتن پور میں سنیلا دیوی کی گمشدگی کی رپورٹ درج کرائی۔ پولس نے ملزم شوہر شیویش کمار اور سسر امریش پاسوان کو چھاپہ ماری کر کے رتن پورہ علاقہ سے گرفتار کیا ہے۔

پوچھ تاچھ کے دوران مقتولہ کے شوہر نے بیوی کا قتل کر لاش کو ندی میں پھینکنے کی بات قبول کی۔ جب اس سے یہ پوچھا گیا کہ قتل کا سبب کیا تھا، تو اس نے بتایا کہ بیوی سنیلا مچھلی نہیں بنا پائی تھی، بس اسی بات کو لے کر تنازعہ شروع ہو گیا اور پھر قتل کی واردات انجام دی گئی۔