بہار اسمبلی انتخاب: ’ووٹر لسٹ سے نہیں حذف ہوگا کسی کا نام‘، ووٹر لسٹ میں ترمیم معاملہ پر چیف الیکشن کمشنر کی وضاحت

بہار میں ووٹر لسٹ کی ترمیم کا معاملہ ان دنوں زوروں پر ہے۔ اپوزیشن پارٹیاں، خاص طور سے کانگریس و آر جے ڈی اس کی پرزور مخالفت کر رہی ہیں۔ اس درمیان چیف الیکشن کمشنر گیانیش کمار کا ووٹر لسٹ میں ترمیم پر ہفتہ (5 جولائی 2025) کے روز ایک وضاحتی بیان سامنے آیا ہے۔ انہوں نے کہا کہ ’’ووٹر لسٹ سے کسی کا نام حذف نہیں ہوگا۔‘‘ ایک ذاتی تقریب میں شرکت کرنے فیروزآباد پہنچے گیانیش کمار نے انسپیکشن بلڈنگ میں ڈسٹرکٹ مجسٹریٹ رمیش رنجن اور سینئر پولیس سپرنٹنڈنٹ سوربھ دیکشت سے ملاقات بھی کی۔

نامہ نگاروں سے بات کرتے ہوئے چیف الیکشن کمشنر گیانیش کمار نے کہا کہ ’’بہار اسمبلی انتخاب کی تیاری 4 ماہ پہلے شروع ہو چکی ہے۔ الیکشن کمیشن کے لیے سب سے اہم ووٹرس ہوتے ہیں اور پھر سیاسی جماعتیں۔ بہار اسمبلی انتخاب سے قبل فہرست تیار کرنے کے حوالے سے جو سوال اٹھائے جا رہے ہیں وہ بے بنیاد ہیں۔‘‘ ساتھ ہی انہوں نے کہا کہ ’’انتخاب سے قبل ریاست کی سیاسی جماعتوں کے ساتھ میٹنگ کی گئی ہے۔ تقریباً 5000 میٹنگیں اب تک منعقد کی جا چکی ہیں، جس میں 28000 سے زائد قومی سیاسی جماعتوں اور علاقائی سیاسی جماعتوں کے ممبران نے شرکت کی ہے۔‘‘

بہار کے کوسی ندی علاقہ میں رہ رہے ووٹرس کے نام فہرست سے ہٹائے جانے اور اپوزیشن جماعتوں کی جانب سے الیکشن کمیشن پر سوال اٹھائے جانے کے معاملہ پر گیانیش کمار نے کہا کہ ’’الیکشن کمیشن کی جانب سے جو بھی حکم جاری کیا جاتا ہے، اس کو پہلے پڑھ لیا جائے اور اس کے بعد بحث کی جائے تو زیادہ بہتر رہتا ہے۔ بہار میں کسی بھی ووٹر کو ووٹر لسٹ سے نہیں ہٹایا جائے گا۔‘‘ ساتھ ہی انہوں کہا کہ ’’بہار میں 2003 میں ہوئے اسمبلی انتخاب کی ووٹر لسٹ میں جو بھی ووٹر ہے، انہیں آئین کے آرٹیکل 326 کے تحت اہل ووٹر تصور کیا جائے گا۔‘‘

چیف الیکشن کمشنر کے مطابق کوسی ندی کے آس پاس کے سیلاب زدہ علاقوں میں رہ رہے لوگ جن کا نام 2003 کی ووٹر لسٹ میں ہے، ان سے اور ان کے بچوں سے کسی بھی قسم کا دستاویز ثبوت کے طور پر نہیں مانگا جا رہا ہے۔ گیانیش کمار نے یہ بھی کہا کہ 2002 میں بہار ریاست کی ووٹر لسٹ کی مکمل نظر ثانی جس طرح کی گئی تھی، اسی طرح اس بار بھی جولائی سے اگست تک ووٹر لسٹ کی دوبارہ نظر ثانی کی جا رہی ہے۔ اس کی ڈیڈ لائن 31 دن کی ہوتی ہے، اسی متعینہ مدت میں ووٹر لسٹ کا کام مکمل کر لیا جائے گا۔