کسانوں کے احتجاج پر بھوپندر ہڈا کا بیان، حکومت سے مذاکرات اور حل کی اپیل

چنڈی گڑھ: کانگریس کے سینئر رہنما اور ہریانہ کے سابق وزیر اعلیٰ بھوپندر سنگھ ہڈا نے جمعرات کو کسانوں کے احتجاج پر کہا کہ سپریم کورٹ نے واضح کر دیا ہے کہ ہر شہری کو جمہوری طریقے سے اپنی بات کہنے کا حق حاصل ہے۔ انہوں نے کہا کہ کسی بھی شہری کو اپنی بات پرامن طریقے سے کہنے سے روکا نہیں جانا چاہیے لیکن اگر کوئی قانون توڑنے کی کوشش کرے، تو اس کے خلاف سخت کارروائی ہونی چاہیے۔

بھوپندر ہڈا نے حکومت سے اپیل کی کہ وہ کسانوں کے ساتھ بات چیت کر کے ان کے مسائل کا حل نکالے۔ انہوں نے یاد دلایا کہ کم از کم امدادی قیمت (ایم ایس پی) کے مسئلے پر کافی پہلے کمیٹی بنائی گئی تھی، لیکن حکومت نے اس پر ابھی تک کوئی قدم نہیں اٹھایا۔

انہوں نے کہا کہ کسانوں کی مانگیں جائز ہیں اور حکومت کو ان پر غور کرنا چاہیے۔ ہڈا نے کسانوں سے اپیل کی کہ وہ پرامن طریقے سے دہلی کی حدود میں داخل ہو کر اپنے مطالبات پیش کریں۔

ہڈا نے مزید کہا کہ کسان مظاہروں میں حکومت کے تعاون کے لیے تیار ہیں، اور اگر کسی نے ٹریکٹر-ٹرالی نہ لانے کی بات کی ہے، تو کسانوں نے بھی اس پر اتفاق کیا ہے۔ کسان رہنما سورن سنگھ پندھیر نے کہا کہ حکومت کسانوں کے مطالبات کو سنجیدگی سے نہیں لے رہی، اور جب تک ان پر غور نہیں کیا جائے گا، احتجاج جاری رہے گا۔ کسانوں کے دہلی مارچ کے اعلان نے ایک بار پھر زرعی مسائل کو اجاگر کر دیا ہے، جس پر حکومت سے فوری توجہ دینے کی توقع کی جا رہی ہے۔