بانڈی پورہ: جیش محمد سے وابستہ ایک مقامی ملی ٹنٹ گرفتار

سری نگر: جموں و کشمیر پولیس نے شمالی کشمیر کے ضلع بانڈی پورہ میں جیش محمد سے وابستہ ایک مقامی ملی ٹنٹ کو گرفتار کرنے کا دعویٰ کیا ہے، جس نے محض بارہ روز قبل ملی ٹنٹوں کی صفوں میں شمولیت اختیار کی تھی۔ گرفتار شدہ ملی ٹنٹ کی شناخت پنزی گام بانڈی پورہ کے رہنے والے 24 سالہ امتیاز احمد خان ولد فیاض احمد خان کے طور پر ہوئی ہے۔

ایس ایس پی بانڈی پورہ راہل ملک نے گزشتہ روز جمعرات کو یہاں ایک پریس کانفرنس کے دوران نامہ نگاروں کو بتایا کہ 'ہم نے پنزی گام کے رہنے والے امتیاز کو پکڑا ہے۔ یہ پچھلے بارہ دنوں سے لاپتہ تھا۔ جس دن یہ لاپتہ ہوا ہمیں اسی دن شک ہوا کہ یہ غیر قانونی سرگرمیوں میں ملوث ہو چکا ہے'۔

انہوں نے کہا کہ 'امتیاز نے جیش محمد نامی تنظیم جوائن کی تھی۔ اس کی سرگرمیاں پہلے سے ہی مشتبہ رہی ہیں اور اس کو گرفتار بھی کیا گیا تھا۔ یہاں کا ایک ملی ٹنٹ عمر شعبان، جو سوپور میں مارا گیا تھا، یہ اس کا دوست ہے۔ قوم دشمن عناصر نے اسی کا فائدہ اٹھایا اور امتیاز کو ملی ٹنٹوں کی صفوں میں شمولیت کے لئے تیار کیا'۔

ایس ایس پی نے امتیاز کی گرفتاری پر بات کرتے ہوئے کہا کہ 'ہمیں 26 جنوری کو اس کی سوپور میں موجودگی سے متعلق خفیہ اطلاع ملی تھی۔ بانڈی پورہ اور سوپور پولیس کے علاوہ سیکورٹی فورسز نے کارڈن اینڈ سرچ آپریشن چلایا تھا۔ لیکن امتیاز تب اندھیرے کا فائدہ اٹھاتے ہوئے فرار ہونے میں کامیاب ہو گیا تھا'۔

ان کا مزید کہنا تھا کہ 'ہمیں پھر اطلاع ملی کہ امتیاز بانڈی پورہ آ رہا ہے۔ ہم نے آج یہاں ایک مشترکہ ناکہ بٹھایا جس دوران امتیاز کی گرفتاری عمل میں لائی گئی۔ اس کے قبضے سے ایک گرینیڈ اور کچھ راؤنڈس گولیاں برآمد ہوئی ہیں۔ پھر امتیاز کے ہی انکشاف پر ہم نے ایک خفیہ ٹھکانے سے مزید اسلحہ و گولہ بارود برآمد کیا'۔