23 ماہ سے سیتاپور جیل میں قید اعظم خان کی کل ہوگی رہائی، سیکورٹی کے سخت انتظامات

اترپردیش کے سیتاپور جیل میں 23 ماہ سے قید سماجوادی پارٹی کے رہنما اعظم خان کی رہائی کا عمل منگل (23 ستمبر) کی صبح شروع ہو جائے گا۔ جیل انتظامیہ نے رہائی کے متعلق تمام تیاریاں مکمل کر لی ہیں۔ ہندی نیوز پورٹل ’آج تک‘ پر ذرائع کے حوالے سے شائع خبر کے مطابق اعظم خان کی رہائی منگل کی صبح 7 بجے ہونے کی امید ہے۔ رہائی کے بعد اعظم خان رامپور کے لیے روانہ ہوں گے، جہاں پارٹی کارکنان اور حامیوں کے ذریعہ ان کا شاندار استقبال کیا جائے گا۔ جیل انتظامیہ نے سیکورٹی کے سخت انتظامات کیے ہیں، تاکہ رہائی کا عمل پرامن طریقے سے مکمل ہو سکے۔ اس درمیان سیاسی گلیاروں میں اعظم خان کی رہائی سے متعلق بحثیں تیز ہو گئی ہیں۔

اعظم خان کے وکیل زبیر محمد خان نے اس بارے میں جانکاری دیتے ہوئے بتایا کہ ’’محمد اعظم خان کے کورٹ سے تقریباً 55، اور بقیہ پروانے دوسرے کورٹ سے گئے ہیں۔ کُل کتنے پروانے گئے ہیں اس کے بارے میں میں نہیں بتا سکتا۔ کچھ پروانے وہاں پہنچ بھی گئے ہیں۔‘‘ واضح ہو کہ اعظم خان سیتاپور جیل میں مختلف مقدمات کے تحت بند ہیں۔ ان کے خلاف زمین پر قبضہ اور سرکاری جائیداد کو نقصان پہنچانے سمیت دیگر الزامات شامل ہیں۔ ان معاملوں میں سے کچھ میں انہیں الٰہ آباد ہائی کورٹ سے ضمانت ملی تھی، لیکن دیگر معاملوں میں قانونی عمل اب بھی جاری ہے۔

قابل ذکر ہے کہ حال ہی میں سیتاپور جیل میں اعظم خان کی صحت کو لے کر ان کی اہلیہ تنزین فاطمہ نے تشویش کا اظہار کیا تھا۔ اس سے قبل اعظم خان کے بیٹے عبد اللہ اعظم بھی ان سے ملاقات کرنے جیل پہنچے تھے، ان کے لیے ادویات اور کھانے پینے کی اشیاء بھی ساتھ لے کر گئے تھے۔ ملاقات کے دوران ان کی بات چیت سیاست سے ہٹ کر خاندانی اور قانونی معاملات پر مرکوز رہیں۔