رائے بریلی: کانگریس رکن اسمبلی ادیتی سنگھ پر قاتلانہ حملہ، بی جے پی رہنما کے بھائی پر الزام

یو پی اے کی چیئر پرسن سونیا گاندھی کے پارلیمانی حلقہ انتخاب رائے بریلی میں کانگریس کی رکن اسمبلی ادیتی سنگھ پر منگل کے روز قاتلانہ حملہ کیا گیا۔ اطلاعات کے مطابق حملہ آوروں نے ان کی گاڑی کا تعاقب کیا اور ان کے قافلہ پر فائرنگ کی۔

حملہ کے نتیجہ میں ادیتی سنگھ کی گاڑی کے علاوہ قافلہ کی تین مزید گاڑیاں بھی پلٹ گئیں۔ ادیتی سمیت کئی رہنماؤں کے زخمی ہونے کی بھی اطلاع ہے۔ زخمیوں کو اسپتال میں علاج و معالجہ کے لئے داخل کرایا گیا ہے۔

اطلاعات کے مطابق ادیتی رائے بریلی ضلع پنچائت کے صدر اودھیش سنگھ کے خلاف لائے گئے عدم اعتماد کی تحریک پر ووٹنگ میں شامل ہونے کے لئے گئی تھیں۔ ووٹنگ میں شامل ہونے کے لئے ضلع پنچائت صدر راکیش اوستھی اپنی گاڑی سے رائے بریلی کے لئے روانہ ہوئے تھے۔

بتایا جا رہا ہے کہ بچھراواں تھانہ علاقہ کے ٹول پلازا اور فلائی اوور کے پاس حملہ آوروں نے راکیش اوستھی کی گاڑی روک لی اور حملہ کر دیا۔ اس دوران حملہ آوروں نے ادیتی سنگھ کی گاڑی کا تعاقب کیا۔ الزام ہے کہ اس دوران ادیتی کی گاڑی پر فائرنگ کی گئی۔ تیز رفتار ہونے کی وجہ سے ادیتی سنگھ کی گاڑی ہرچند پور تھانہ علاقہ کے پاس پلٹ گئی۔

اطلاع موصول ہونے پر پولس فورس موقع پر پہنچی اور صورت حال کو قابو میں کیا۔ فی الحال پورے علاقہ کا ماحول کشیدہ ہے اور چپے چپے پر پولس اہلکار تعینات ہیں۔ وہیں، اس حملہ کی اطلاع موصول ہونے پر لکھنؤ کے آئی جی اور کمشنر بھی رائے بریلی کے لئے روانہ ہو گئے ہیں۔

واضح رہے کہ رائے بریلی کے ضلع پنچائت صدر اودھیش سنگھ کے خلاف کئی ارکان نے عدم اعتماد کی تحریک پیش کی تھی۔ اس حوالہ سے ڈی ایم کو ایک خط سونپا گیا تھا لیکن ڈی ایم نے اس پر نوٹس نہیں لیا۔ تاہم ارکان نے ہائی کورٹ سے رجوع کیا۔ ہائی کورٹ نے اس کے بعد سی جے ایم کی نگرانی میں ووٹنگ کرانے کی ہدایت دی۔ ضلع مجسٹریٹ نے 14 مئی یعنی آج کا دن ووٹنگ کے لئے طے کیا تھا۔

کون ہیں ادیتی سنگھ؟

ادیتی سنگھ رائے بریلی صدر سے کانگریس کی رکن اسمبلی ہیں۔ وہ رائے بریلی سے پانچ مرتبہ کے رکن اسمبلی رہے اکھلیش سنگھ کی بیٹی ہیں۔ انہوں نے امریکہ کی ڈیوک یونیورسٹی سے منیجمنٹ کی تعلیم حاصل کی ہے۔ امریکہ سے واپس آنے کے بعد 2017 میں انہوں نے رائے بریلی صدر سے انتخاب لڑا اور 90 ہزار ووٹوں سے جیت حاصل کی۔